Саха сириттэн төрүттээх Кеша Неймохов Санкт-Петербурга төрөөбүтэ уонна улуу куорат уопсастыбаннай олоҕор олус көхтөөхтүк кыттар. Кеша 2017 сыллаахха ыам ыйын 9 күнүгэр “Үйэлээх уот” историческай мемориалга бочуоттаах харабылга турбутунан биир дойдулаахтара киэн туттабыт. Эмиэ ити сыл тохсунньу 27 күнүгэр, ол эбэтэр Ленинграды төгүрүйүүттэн таһаарыы күнүгэр, бочуоттаах харабылга ыҥырыллыбыта. Бэйэтин үчүгэй өттүнэн эрэ көрдөрөрүн, харабылга туруу курдук үрдүк чиэһи үтүө суобастаахтык толорорун сыаналаан, аны 2018 сыллаахха ыам ыйын 9 күнүгэр харабылга Петербург эдэр ыччатын сойууһун аатыттан турбута. Уолчаан быйыл да бочуоттаах харабылга тураары, күн аайы буолар эрчиллиилэргэ кытта сылдьар. Бу сырыыга Кеша хамаандалары туруортааччы буолуохтаах.
edersaas.ru
Кеша былырыын төрөппүттэрин кытары олорор Василеостровскай оройуонун 11 гимназиятын вице-президенинэн талыллыбыта.
2004 сыллаахха Санкт-Петербург куоракка күн сирин көрбүт уолчаан 4 сааһыттан джиу-джицу көрүҥүнэн дьарыктанан барбыта. Кини — Мария Петровна уонна Саха сирин норуодунай суруйааччыта Егор Петрович Неймоховтар сиэннэрэ. Биэс сааһыгар киниэхэ араҕас кур (желтый пояс) иҥэриллибитэ, онтон икки сылынан дзюдоҕа көспүтэ. “Факел” диэн спорт кулууба ыытар күрэхтэһиилэригэр кыттыбыта. Түмүктэрэ да киһини үөрдэллэр: кыра уолаттарга, кохайга эмиэ кыра уолаттар ортолоругар, дзюдоҕа аһаҕас күрэхтэһиигэ бастакы миэстэлэри ылбыта.
Кеша бастакы кылааска үөрэнэ сылдьан саахыматынан дьарыктанан, “Ороһуоспатааҕы” саахымат бэстибээлигэр 5 разрядтаах турнирга оонньообута. Уолчаан спорду өрө тутан, этин-хаанын чэбдигирдэн, биир саастыылаахтарын ортотугар үтүө холобурга сылдьыбыта.
Хомойуох иһин, 2012 сыллаахха сиһин тоноҕоһугар компрессионнай тостууну ылан, сыл аҥаара суорҕаннаах-тэллэххэ сытан, спортан тэйэргэ күһэллибитэ. Ол да буоллар, уолчаан спордунан дьарыктаммакка сылдьыан баҕарбатаҕа. Онон, 13 сааһыгар бальнай үҥкүүнэн «ыалдьыбыта». Дьоҕурдаах уол манна эмиэ үрдүк ситиһиилэрдэммитэ. «Виват Зенит-2016» регионнар икки ардыларынааҕы куонкуруска педъестал 1 үктэлигэр чиэстээхтик тахсыбыта. “Тахсан эрэр сулустар” куораттааҕы куонкуруска икки сыл иккис миэстэни ылбыта, “Грация-2015” куонкуруска, Васильевскай оройуон “Олунньутааҕы көрсүһүүлэр-2015” аһаҕас куонкуруска оҕолор ортолоругар үһүс миэстэлэргэ тахсыбыта. Онтон да элбэх куонкурустарга саха уола наар үс бириистээх миэстэлэртэн түспэт.
Кеша Неймохов 2013 сыллаахха Ленинград куорат “Суоппарга сурук” ааксыйатыгар, Аҕа дойду Улуу сэриитигэр Кыайыы 70 сылыгар аналлаах дьаһалларга көхтөөхтүк кыттыбытын иһин грамоталарынан наҕараадаламмыта. Уолчаан ону сэргэ муусукаҕа бөлөҕүнэн оонньуурун, балааккалаах, гитаралаах походтарга сылдьарын сөбүлүүр.
Сахалары ааттата сылдьар биир бастыҥ уолбутугар Кешаҕа быйылгы ыам ыйын 9 күнүнүн бырааһынньыга ситиһиилээхтик ааһарыгар баҕарыаҕыҥ.
Надежда ЕГОРОВА, “Саха сирэ”, edersaas.ru