«Өйдөөх» дьиэлэрдээх Жатай бөһүөлэгэр

Бөлөххө киир:

Ааспыт нэдиэлэ бүтүүтэ сыана бэлиитикэтин судаарыстыбаннай кэмитиэтин бэрэссэдээтэлэ Антонина Винокурова, кини бастакы солбуйааччыта Марина Лыкова уонна туһааннаах салаа исписэлиистэрэ Жатай бөһүөлэгин итиинэн, уунан хааччыйар эбийиэктэрин, итиэннэ «өйдөөх» дьиэлэр хайдах  үлэлии туралларын көрдүлэр-иһиттилэр.

edersaas.ru, Сыана бэлиитикэтин судаарыстыбаннай кэмитиэтин пресс-сулууспата

Аан бастаан үлэһиттэр «Жатайтеплосеть» тэрилтэ икки хочуолунайын көрдүлэр. Бу хочуолунайдар уонунан сыллар тухары тигинэччи үлэлии тураллара хайҕаллаах. Оборудованиелар кэмиттэн-кэмигэр саҥардыллан, улахан  кыһалҕа тахсыбат. Быйылгыттан саҕалаан инвестиционнай бырагыраама чэрчитинэн ититии ситимэ саҥардыллар. 2,5 килэмиэтир уһуннаах ситим  тардыллыбыт. Өссө 800 миэтэрэ оҥоһуллара хаалбыт. Маны таһынан  турбалары кэтирэтэн биэрбиттэр.

Бэрэссэдээтэли бастакы солбуйааччы Марина Лыкова хочуолунайдарга сылдьан баран, паарынан үлэлиир хочуоллары ууну сылытыы ньыматынан үлэлииргэ көһөр табыгастааҕын бэлиэтээтэ. Манна “Якутцемент” тэрилтэ үлэтин холобурдаата. Өскөтүн ууну ититиигэ көстөхтөрүнэ үптэрин кэмчилиэхтэрин уонна ороскуоттарын кылгас кэм иһигэр сабыахтарын сөбүн сүбэлээтэ.

Салгыы Жатай кирдээх уутун оботторор, ыраастыыр ыстаансыйалары көрдүлэр.  «Водоканал»  Жатай кирдээх уутун ыраастыыр биир ыстаансыйатын бэйэтин көрүүтүгэр ылыахтаах, онтон кэлэр сылларга кирдээх ууну ыраастыыр ыстаансыйаны бөһүөлэккэ тутуохтаах. Оччотугар саҥа схеманан уу «Жатайтеплосеть» ситиминэн саҥа эбийиэк ыраастыыр ыстаансыйатынан ааһыахтаах.

Бу кэннэ  Чехия Өрөспүүбүлүкэтин ньыматынан тутуллубут “өйдөөх” дьиэ ууга, уокка, ититиигэ төһө үбү-харчыны  кэмчилээн олорорун көрдүлэр. Олорор дьиэ үөһэ этээһигэр ититэр систиэмэлэрэ баар. Хас биирдии дьиэ олохтооҕо ититиитин уонна уотун күүһүн бэйэтэ хонтуруоллуур. Күн сылааһын күүһүнэн уоттанан олорор буоланнар, уот харчытыгар улаханнык ороскуотурбаттар.

Мантан салгыы Жатайдааҕы тырааныспар хампаанньатын бөҕү уматар оборудованиетын үлэтин кытары билистилэр.  Бу Саха сиринээҕи «Эко-Энергия» хааччахтаммыт эппиэтинэстээх тэрилтэ бэйэтэ айан таһаарбыт тэрилэ. Онон инникитин бөһүөлэк бөҕүн-сыыһын барытын манна аҕалан уматыахтаахтар. Бу оборудование докумуона барыта хомуллан оҥоһулуннаҕына,  тарыып олохтонон, жатайдар бөҕү хомуйуу иһин тарыыптарыттан тырааныспар ороскуота биллэ намтыаҕа.

Сыана бэлиитикэтин судаарыстыбаннай кэмитиэтин пресс-сулууспата

+1
0
+1
0
+1
0
+1
0
+1
0
+1
0
+1
0