Кулун тутар 26 күнүгэр Дьокуускайга, Жатайга олорор, 65-тэн үөһээ саастаах 19 822 үлэлээбэт биэнсийэлээххэ дьиэҕэ олороллорун иһин, 2000 солкуобайы ыыттылар. Өссө 2000 солкуобайы “изоляция” бүппүтүн кэннэ ыытыахтара. Бу социальнай көмө уопсай суумата — 4000 солкуобай, өрөспүүбүлүкэ хаһаас (резервнэй) пуондатыттан үбүлэнэр.
edersaas.ru
Туох да сайаапката-тойо суох, биэнсийэлээхтэр каарталарыгар, этэргэ дылы, халлаантан харчы кэлэн түспүтүгэр, үгүстэр үөрдүлэр, маннык ыйааҕы таһаарбыт Ил Дархаҥҥа махтаннылар. Бу кинилэр бородуукта, эмп-томп ылалларыгар көмөлөөх буолуоҕа.
Ол эрээри, сорохтор ылбатыбыт диэн, улаханнык мунаахсыйдылар. Холобур, буоста нөҥүө биэнсийэлэрин ылааччыларга тиийэ илик. Буоста үлэһиттэрэ кулун тутар 31 күнүгэр диэри дьиэлэригэр илдьэн биэриэхтээхтэр.
Дьокуускай куорат дьаһалтатын социальнай управлениетын салайааччы Семен Матвеев бу курдук быһаарда:
— Куоракка олорор эрээри, улууска бырапыыскалаах дьон ылбаттар. Аны үлэ бэтэрээнэ буолбакка хаалбыт дьон бааллар. Кинилэр ылыахтаахтар эрээри, биһиги “ЕДВ”-ны биэрэр испииһэкпитигэр киирбэккэ хаалбыттар. Онон эбии испииһэги оҥоро сылдьабыт.
Биһиги билигин дьиэҕэ олорон үлэлиибит. Ол эрээри, 31-95-10 ыспыраапкалаһар төлөпүөҥҥэ эрийэн, эбэтэр 89241694602 нүөмэр батсаабыгар суруйан, докумуоннаргытын хаартыскаҕа түһэрэн ыыттаххытына, эбии испииһэккэ киллэриэхпит.
Маннык докумуоннар наадалар: пааспар, СНИЛС, үлэ киниискэтэ, каарта реквизиттэрэ.
“Изоляция” бүппүтүн кэннэ, өссө 2000 солкуобайы ыытыахтаахпыт. Манна “изоляция” усулуобуйатын тутуспутун хайдах бэрэбиэркэлиигит диэн ыйыталлар. Социальнай тырааныспар каартатынан туһанан, оптуобуска үстэн элбэхтик айаннаабыт киһи харчыны ылбат. Каартанан ким-хайдах айаннаабытын биһиги ырылхайдык көрөн олоробут, — диэн Семен Матвеев кэпсээтэ.
Санатар буоллахха, сааһырбыт дьон билигин уопсастыбаннай миэстэҕэ сылдьаллара, оптуобуһунан айанныыллара бобуллар. Бу кинилэр доруобуйаларын харыстааһын миэрэтэ буолар. Ол эрээри, Айсен Николаев букатын хаайыллан олорбокко, харыстанар миэрэлэри тутуһан, сарсыарда эрдэ дьон суох сиринэн хааман, салгын сиэн киириэххэ сөп диэн эппитэ.
Ангелина Васильева, “Саха сирэ” хаһыат, edersaas.ru
Хаартыска: Якутск.рф