Уус Алдан улууһугар, Найахыга, бэлиэ түгэн буолан ааспытын туһунан олохтоох бибилэтиэкэ сэбиэдиссэйэ Айталина Готовцева иһитиннэрдэ.
—«Саха АССР 15 сыла» бэлиэ хаһаайына, бэрэссэдээтэлинэн таһаарыылаахтык үлэлээбит Бочуоттаах холкуостаах, нэһилиэккэ начаалынай оскуоланы сүүрэн-көтөн, туруорсан астарбыт уопсастыбанньык-новатор Иван Иванович Гоголев II-Дыргыабай аата Найахы агрохайысхалаах орто оскуолатыгар иҥэриллибитэ олохтоохтору улаханнык үөртэ, долгутта.
Оскуолаҕа үтүө, ытык киһибит сырдык аатын сүгэрин туоһулуур анал суруктаах мемориальнай дуоска ыйанна. И.И.Гоголев II -Дыргыабайга аналлаах истиэндэ үөрүүлээх чааһа өрө көтөҕүллүүлээхтик буолан ааста. Үөрүүлээх тэрээһиҥҥэ улуус баһылыгын солбуйааччы Михаил Борисов, улуус үөрэххэ управлениетын начаалынньыгын солбуйааччы Данил Жирков, И. И. Гоголев II -Дыргыабай сиэннэрэ, аймахтара кыттыыны ыллылар. Салгыы оскуола үөрэнээччилэрэ хоһоон аахтылар, ырыа ыллаатылар, саалаҕа мустубут ыалдьыттар үөрүүлэрин үрдэттилэр, — диэн кэпсээтэ.
И И.Гоголев II-Дыргыабай 2018 сыл ахсынньы 16 күнүгэр төрөөбүтэ 125 сылын туолбута. Дьон-сэргэ ытыктабылын, билиниитин, тапталын ылбыт киһи сырдык аатыгар сүгүрүйэн, сыл устатыгар араас элбэх тэрээһиннэр, акциялар ыытыллыбыттар.