СӨ Бырабыыталыстыбатын Бэрэссэдээтэлин солбуйааччы Ольга Балабкина бүгүн, от ыйын 8 күнүгэр, өрөспүүбүлүкэҕэ коронавирус балаһыанньатын билиһиннэрдэ.
—Бүтэһик хонукка бу кутталлаах ыарыыга өрөспүүбүлүкэ үрдүнэн барыта 47 киһи сутуллубута бэлиэтэнэр. Итинтэн 40 киһи Дьокуускайга, 4 — Нерюнгрига уонна Мэҥэ Хаҥалас, Дьааҥы улуустарыгар, — диэтэ.
Ольга Валерьевна коронавируһу утары охсуһар Мэҥэ Хаҥалас, Мииринэй, Дьааҥы уонна Дьокуускай суһал ыстааптарын бүгүҥҥү мунньаҕар дьаҥ тарҕаныытын уонна ону бохсууга ыытыллар үлэлэр, миэрэлэр тустарынан кэпсэтии буолбутун иһитиннэрдэ. Маныаха Дьааҥы оройуонугар коронавируһу эмтииргэ уонна хонтуруолу күүһүрдэргэ бэлэмнэр диэтэ. Дьааҥы уонна Мииринэй оройуонугар дьон тиийиитэ элбэҕинэн, хааччахтанан олорууга, хантаактаахтары быһаарыыга, уопсастыбаннай сирдэргэ мааскалаах, бэрчээккилээх сылдьыыга ирдэбил улааппыт. Оттон Мэҥэ Хаҥаласка дьаҥтан үтүөрээччи элбээбитин иһин, саҥа дьаҥнааччылар бааллара сэрэхэдитэрин бэлиэтээтэ. Улуустарга дьаҥы бохсууга үлэлэһэр суһал ыстааптар тыа сиригэр тиийээччилэргэ ураты болҕомтону ууралларын, онон хонтуруол баарын иһитиннэрдэ. Сыстыганнаах дьаҥы тарҕаппат туһуттан, Нерюнгрига хамыыһыйа дьон-сэргэ уопсастыбаннай сирдэргэ сылдьарыгар маасканы булгуччу кэтэригэр ирдэбили кытаатыннарбыт.
Түмүккэ: —Бары, кыра оҕотуттан улахан дьонугар тиийэ, ирдэбили хайаан да тутуһарбыт наада. Уопсастыбаннай сирдэргэ дьиэттэн мааскалаах, бэрчээккилээх тахсыы, бэйэ икки ардыгар тэйиччи сылдьыы булгуччу тутуһуллара наада, — диэн тоһоҕолоото.