Елена Голомарева, Ил Түмэн аҕыйах ахсааннаах хотугу норуоттар, Арктика дьыалаларыгар сис кэмитиэтин бэрэссэдээтэлэ:
— Арассыыйа Федерациятын Конституцията – Төрүт Сокуон дойдубут инники сайдар оҥкулун быһаарар сүҥкэн суолталаах докумуон буолар. Конституция ыстатыйаларыгар олоҕуран, федеральнай сокуоннар ылыллаллар. Биһиги Конституциябытыгар уларыйыылары киллэрии дойдубут бэйэтэ бэйэтин дьаһанар усулуобуйатын тэрийэр. Үөрэҕирии, доруобуйа харыстабыла, социальнай эйгэ, култуура, сир-уот боппуруостарыгар киэҥ дьайыылаах уларыйыылар киириэхтээхтэр. Аччыгый, орто биисинэс сайдыытыгар олук ууруллар.
Арктика боппуруостарыгар эргиллэр буоллахха, саҥа сокуон ылыллан, бу киэҥ сир-уот сайдарыгар улахан бырагыраамалар дьүүллэһиигэ киириэхтээхтэр. Аҕыйах сылынан Арктика сайдан, Арассыыйа атын эрэгийиэннэриттэн инники күөҥҥэ тахсарын туһугар Стратегия ылыллан турар. Бу Стратегияҕа Арктика олохтоохторугар, бырамыысыланнас сайдыытыгар саҥа хардыылары көрөбүт. Бу – кэм ирдэбилэ.
РФ Конституциятын 69-с ыстатыйата кэҥээн биэрэн, аҕыйах ахсааннаах төрүт олохтоох норуоттар бырааптара норуоттар икки ардыларынааҕы быраап нуормаларынан уонна Арассыыйа Федерацията норуоттар икки ардыларынааҕы дуогабардарын бириинсиптэринэн мэктиэлэнэр. Бу нуорма бары норуоттар култуурунай уратыларын, тыл эгэлгэтин судаарыстыба көмүскүүрүн мэктиэлиир эбэһээтэлистибэнэн эбиллэн биэрдэ.
Төрүт Сокуон олохпут инники сайдыытын мэктиэлиир, хас биирдиибит: оҕоттон, ыччаттан кырдьаҕаска тиийэ, кыһалҕабытын быһаарар сүдү докумуон буолар.
Бэлэмнээтэ Ангелина Васильева, «Саха сирэ» хаһыат, edersaas.ru
Хаартыска: интэриниэттэн.