Анастасия Ефремова аныгы үйэ ыччатын сиэринэн, бэйэтэ айыан—тутуон баҕата баһыйан, бэйэ дьыалатын тэринэн, билигин “Кырасыабай буолуу кистэлэҥэ” салоннаах.
Кини Москватааҕы Аныгы искусство институтун филиалын бүтэрэн, дизайнер идэтин баһылаабыт. Дьүөгэтэ Юлия Павловалыын бастаан бэйэ дьыалатын арыйыахтарын иннинэ, дьиэлэригэр олорон бэйэлэрин билэр дьонноругар баттах кырыйан, тыҥырах оҥорон саҕалаабыттар. Онтон сыыйа сатабыллаах кыргыттар бэйэлэрин кыахтарыгар эрэнэн, кырасыабай буолуу салонун арыйбыттар.
Анастасия Ефремова аҕата Валентин Атласов — Өймөкөөн улууһун Үчүгэй нэһилиэгин баһылыга, дууһатынан худуоһунньук буолан, кыыс искусствоҕа кыра эрдэҕиттэн уһуйуллубут.
Айар куттаах урбаанньыт оҕуруоттан киэргэллэри оҥорон дьарыктана сылдьыбыт. Биирдэ аатырбыт ырыаһыт Ингрид интэриниэти хасыһа олорон, “ВКонтакте” ситимҥэ саха кыыһа Анастасия Ефремова үлэлэрин көрөн, киниэхэ сибээскэ тахсан, бэртээхэй илии киэргэлин сакаастаан турардаах. Бу түгэн биир кэмҥэ аан дойдуга соһуччу сонун буолан тилийэ көппүтүн өйдүүр буолуохтааххыт. Ол туһунан Анастасия бу курдук кэпсиир:
— Ингрид продюсера мин үлэлэрбин интэриниэккэ көрөн баран, оҕуруонан саҕа, браслет уонна митенка (илиигэ кэтэр тарбаҕа суох бэрчээккэ) сакаастаабыттара. Ырыаһыт балтараа ыйынан Москваҕа кэнсиэрдии кэлиэхтээх этэ. Сүрүннээн, японскай оҕуруону уонна жемчуг оҕуруону туттубутум. Ол үлэлэрбин Ингрид гримернайыттан уоран ылбыттар этэ. Инньэ гынан, саҥаны үлэспиттэрэ.
“Кырасыабай буолуу кистэлэҥэ” салон хаһаайката оҕуруонан киэргэл оҥорорун таһынан, кэрэ буолуу кистэлэҥин баһылыыр. Онон сатабыллаах дизайнерга арас көрүҥнээх сакаас күн аайы киирэ турар.
Елена ПОТОЦКАЯ, «Саха сирэ» хаһыат, edersaas.ru