Индустриальнай паарканы сайыннарарга федеральнай киинтэн харчы киирэрин туруорустулар
Бу нэдиэлэ саҥатыгар «Уһук Илини сайыннарар корпорация» генеральнай дириэктэрин э.т. Аслан Канукоев СӨ экэниэмикэтин миниистирин 1 солбуйааччы Владимир Сивцеви, «Хаҥалас» индустриальнай паарка дириэктэрин Дмитрий Борисовы кытта урутаан сайдар сир резиденнэрин кытта көрүстүлэр.
edersaas.ru
Бу көрсүһүүгэ Хаҥаласка диэри кытаанах бүрүөһүннээх суолу, массыына төгүрүччү айанныыр кольцевой сирин оҥорорго, Капитоновкаҕа 1400 кв.м. иэннээх административнай дьиэни тутарга, бырамыысыланнай былаһаакканы инфраструктуранан хааччыйарга, «Саюри» тэпилииссэни тымныы уу ситимигэр холбуурга федеральнай бүддьүөттэн үп-харчы кэлэрин туруорустулар.
Салгыы делегация Жатайга сылдьан суудуналары тутар уонна өрөмүөннүүр үрдүкү технологиялаах собуот тутуутун билистэ. Манна инфраструктураны сайыннарарга, Аллараа Бэстээххэ таһаҕас тиэллэр терминалын тутарга эмиэ федеральнай киинтэн өйөбүл наадатын бэлиэтээтилэр.
Бүгүн делегация Нерюнгрига «Соҕурууҥҥу Саха сирэ» урутаан сайдар сиргэ сылдьыаҕа. Ол туһунан СӨ Экэниэмикэтин пресс-сулууспата иһитиннэрэр.
Марианна Тыртыкова, «Саха сирэ», edersaas.ru