Биэс сыл устата “Харысхал” аһымал фондата инбэлиит оҕолорго араас көрүҥнээх көмөнү оҥорон кэллэ. Бу күннэргэ фонд бэйэтэ көмөлөһөр оҕолоругар саҥа дьыллааҕы “Чысхаан” бэлэхтэри туттартыыр.
Ангелина ВАСИЛЬЕВА, «Саха сирэ» хаһыат, www.edersaas.ru
“Чысхаан” бэлэҕи бизнесмен Максим Бравин салалтатынан айар бөлөх оҥорбут. Айар бөлөххө худуоһунньуктар, дизайнердар, IT-исписэлиистэр киирэн, оҕолору үөрдэр, сөхтөрөр туһугар үлэлээбиттэр. Бэлэххэ сакалаат кэмпиэттэри таһынан “Бул-ка!” диэн остуол оонньуута, төлөпүөҥҥэ сахалыы, нууччалыы, английскайдыы остуоруйаны истэр, Чысхааны кытары хаартыскаҕа түһэрэр сыһыарыылар бааллар.
Өрөспүүбүлүкэ үрдүнэн бу бэлэхтэр атыыларын сорох чааһа “Харысхал” фондаҕа бэриллэн иһэр.
Вера Душкевич, “Харысхал” аһымал фонда дириэктэрэ:
—Биһиги фондабыт сыллата доруобуйаларыгар хааччахтаах оҕолорго анаан Саҥа дьыллааҕы бырааһынньыктары тэрийэр, бэлэхтэри туттартыыбыт. Онуоха ыраах улуустарга олорор оҕолор бары кэлэр кыахтара суоҕа биллэр. Ааспыт нэдиэлэҕэ бэлэхтэри тиэммит массыына Бэрдьигэстээҕинэн Мииринэйгэ диэри Бүлүү умнаһын улуустарыгар айаннаата. Онон оҕолорбут минньигэс кэмпиэттэри эрэ буолбакка, сайыннарар оонньуулары тутан, бириэмэлэрин туһалаахтык атаарыахтара, үөрүөхтэрэ-көтүөхтэрэ диэн бигэ эрэллээхпин.Айар бөлөх салайааччыта Максим Бравин инбэлиит оҕолорго ураты бэлэҕи оҥорбутун таһынан, улуустарга тиэрдэргэ ылсыбытын иһин, махталбытын тиэрдиэхпитин баҕарабыт.
Ангелина ВАСИЛЬЕВА, «Саха сирэ» хаһыат, www.edersaas.ru