Ил Түмэҥҥэ тыа хаһаайыстыбатын I дэкээдэтэ саҕаланна...
Олох-дьаһах

Ил Түмэҥҥэ тыа хаһаайыстыбатын I дэкээдэтэ саҕаланна

Дэкээдэ чэрчитинэн норуот дьокутааттара тыа хаһаайыстыбатын тирээн турар боппуруостарын, судаарыстыба өйөбүлүн тула кэпсэтиилэри таһаарыахтара, хаһаайыстыбаларга сылдьан, үлэни-хамнаһы билсиэхтэрэ.

“Сахамедиа” холбоһук пресс-киинигэр тэриллибит “Аһаҕас парламент” диэн дискуссиялыыр былаһааккаҕа тыа хаһаайыстыбатын боппуруостарыгар анаммыт “төгүрүк остуолга” сүрүн иһитиннэриини тыа хаһаайыстыбатын миниистирэ Александр Атласов оҥордо.


АПК салаата быйылгы сылга икки судаарыстыбаннай бырагырааманан салайыллан үлэлиир. Тыа хаһаайыстыбатын министиэристибэтэ бу бырагыраамалар чэрчилэринэн үлэни-хамнаһы тэрийиигэ федеральнай киини кытары 2 млрд. 200 мөл. суумалаах уон икки сөбүлэһиини түһэристэ. Онон, «Тыа хаһаайыстыбатын сайдыытын уонна тыа хаһаайыстыбатын бородууксуйатын, сырье уонна ас-үөл ырыынагын 2020-2024 сс. сүрүннээһин» бырагырааматынан билиҥҥитэ 786 мөл. солк., оттон “Тыа сирин территорияларын кэлим сайыннарыы” бырагырааматынан 1 млрд. 448 мөл., ону таһынан тыа сирин суолун-ииһин оҥорууга 420 мөл. солк. кэлэр буолбут. Онон ааспыт 2019 сылы кытары тэҥнээтэххэ, быйыл 1 млрд. солк. кэриҥинэн элбэх харчы тардыллара ситиһиллибит. Санатан эттэххэ, “Тыа сирин территорияларын кэлим сайыннарыы” ааспыт сылларга тыа хаһаайыстыбатын сайдыытын бырагырааматын иһинэн үлэлээбитэ, быйылгыттан туспа бырагыраама быһыытынан үлэлиэҕэ.

Ил Дархан хас биирдии министиэристибэҕэ тус сорудахтары биэрэн турар. Тыа хаһаайыстыбатын министиэристибэтигэр үс сорудах бэриллибитэ. Бастатан туран, тыа хаһаайыстыбатын баалабай бородууксуйатын ааспыт сыллаах көрдөрүүтүн 1 бырыһыанынан үрдэтэн, былаан 101 бырыһыан толоруллуохтаах. Иккиһинэн, табаары оҥорооччулары өйөөһүн ырычааҕа ырытыллан оҥоһуллуохтаах. Үсүһүнэн, оҥоһуллар бородууксуйа хаачыстыбата тупсарыллыахтаах.

Кэпсэтиигэ улуустартан хаһаайыстыбалар салайааччылара кытыннылар.

Инньэ гынан, үлэ-хамнас бу сорудахтары толорууга туһаайылынна. Бородууксуйа хаачыстыбатын тупсарыыга анаан, “Сахаагропродукт” кэпэрэтиип иһинэн Аһылык технологиятын киинэ тэриллэн үлэтин саҕалаата. Бу киин астыыр-таҥастыыр хаһаайыстыбаларга саҥа технологиялары киллэриигэ, саҥа астыыр тэриллэринэн хааччыйыыга үлэлиэҕэ итиэннэ технолог идэтигэр үөрэнэр устудьуоннар практикаларын тэрийиэҕэ, улуустартардааҕы астыыр кэмбинээттэр, сыахтар маастардарын, технологтарын идэлэрин үрдэтиэ.
Табаары оҥорооччулары өйөөһүн ырычааҕын ырытан оҥорууга биэдэмистибэлэр икки ардыларынааҕы хамыыһыйа тэриллэн үлэлиир. Бастатан туран, судаарыстыба өйөбүлүнэн төһө кыалларынан үгүс хаһаайыстыбаны хабар инниттэн, үп-харчы өттүнэн чэбдигирдии бырагырааматыгар быйылгыттан дьоҕус хаһаайыстыбалары киллэрэргэ быһаарыллыбыт.

Ирдэбил быһыытынан, бырагыраамаҕа киирэр хаһаайыстыба Тыа хаһаайыстыбатын министиэристибэтигэр отчуоттуур, үүтү-эти туттарыыга дуогабарынан үлэлиир, мэхэньисээссийэлээх биитэр мэхэньисээссийэлэммит аҥардаах хотонноох, сүөһүтүн барытын онно тутар итиэннэ ааспыт сыл түмүгүнэн, ынаҕын ахсыттан 1800 киилэ үүтү ыабыт буолуохтаах. Онуоха ыанар ынахха бэриллэр субсидия кээмэйэ 100 уонна онтон элбэх ыанньыктаах хаһаайыстыбаҕа 20 тыһыынча, 50-99 ыанньыктаах хаһаайыстыбаҕа 10 тыһыынча, 25-49 ыанньыктаахтарга 5 тыһыынча солкуобайынан быһыллыбыт. Оттон үүккэ субсидия ырычааҕа оҥоһулла сылдьар. Ол туһунан сиһилии “Саха сирэ” хаһыат кэлэр нүөмэригэр ааҕыаххыт.

Раиса Сибирякова, «Саха сирэ» хаһыат, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

два × четыре =