Арассыыйа СК Саха Өрөспүүбүлүкэтигэр СУ уһулуччу суолталаах дьыалаларга отделынан Арассыыйа ФКСС (ФСБ) СӨ управлениетын бэрэбиэркэтин матырыйаалынан Ил Түмэн дьокутаата, Өлүөхүмэ оройуонун “Тээнэ” көс аҕа ууһун тыа хаһаайыстыбатын кэпэрэтиибин общинатын баһылыга Арсентий Николаевы бөдөҥ кээмэйдээх кэмиэрчэскэй толуйууну ылбытын туһунан (РФ УК 204 ыст. 8 ч.) көбүтүллүбүт холуобунай дьыаланы силиэстийэлиир.
Силиэстийэ чахчытынан, тыа хаһаайыстыбатын кэпэрэтиибигэр салайааччы эбээһинэһин толорор уорбаланааччы кэпэрэтиип сиринэн кыһыл көмүһү хостуур биир бөдөҥ тэрилтэ туһанар массыына суола ааһарын туһунан билбит.
Бу массыына суолунан сылдьалларын бобуом диэн куттаан дьокутаат кыһыл көмүһү хостуур тэрилтэ салайааччытыгар үрдэтиллибит сыананан кэмиэрчэскэй тэрилтэттэн таас чоҕу тиэйии өҥөтүн оҥороллоругар дуогабар түһэрсэргэ күһэйбит. Ол тэрилтэҕэ генеральнай дириэктэринэн Николаев билэр киһитэ үлэлиир эбит.
Николаев билэр дириэктэрин кытта кэмиэрчэскэй тэрилтэ счетугар кыһыл көмүһү хостуур хампаанньаттан бу дуогабарынан киириэхтээх үптэн 2 бырыһыан кээмэйдээх сокуоннайа суох харчынан толуйууну (вознаграждение) тус бэйэтинэн ыларын туһунан дуогабардаспыт. Силиэстийэ чопчулаабытынан, дьокутаакка бэриллиэхтээх, кини салайар общинатын счетун нөҥүөлээн ылар харчытын кээмэйэ — 4 мөлүйүөн 800 тыһыынча солкуобай.
Кыһыл көмүһү хостуур хампаанньаҕа табыгаһа суох дуогабары толорон, Николаев ыйыытынан хампаанньа ХЭТ счетугар 53 мөлүйүөнтэн тахса солкуобайы ыыппыт, итинтэн сорҕото дьокутаат тус счетугар киирбит уонна итини кини бэйэтин көрүүтүнэн туттубут.
2020 сыл атырдьах ыйын 10 күнүгэр Николаев РФ УПК 91 ыст. ыйыллыбыт буруйу оҥорууга уорбаланан тутуллубут. Билигин холуобунай дьыаланан силиэстийэлиир-оперативнай тэрээһин ыытыллар, дакаастыыр матырыйаал хомуллар.
Силиэстийэ салҕанар.
СИА
Хаартыска: СИА-тан