Ил Дархан Саҥа дьылынан эҕэрдэлиир
· - Бэлиитикэ

Ил Дархан Саҥа дьылынан эҕэрдэлиир

Ытыктабыллаах Саха сирин олохтоохторо!
Саха Өрөспүүбүлүкэтин салалтатын аатыттан уонна тус бэйэм эһигини Саҥа дьылынан уонна Ороһуоспанан ис сүрэхпиттэн итиитик-истиҥник эҕэрдэлиибин!

Саҥа дьылы көрсө хас биирдиибит үгэс быһыытынан түмүк оҥостор, саҥа соруктары туруорар кэмэ тиийэн кэллэ. Биһиги өрөспүүбүлүкэбитигэр 2019 сыл Сомоҕолоһуу сылынан биллэриллэн, хас биирдии киһи олоҕор үтүө уларыйыы тахсарын туһугар түмсүүлээхпитин көрдөрдүбүт. Сахабыт сирин 600 тыһыынчаттан тахса олохтооҕо куораттарга, бөһүөлэктэргэ тупсаҕай эйгэни тэрийэр хамсааһыҥҥа көхтөөхтүк кытынна.

Быйылгы сылга Саха сирин сайдар тэтимин эбии күүһүрдэр уонна түргэтэтэр уларыйыылар буоллулар. Арассыыйа бэрэсидьиэнэ Владимир Путин Өлүөнэ муостатын тутарга быһаарыы ылыммыта барыбыт санаатын өрө көтөхтө. «Сибиир күүһэ» магистральнай гаас турбатын үлэлэтии устуоруйаҕа сүҥкэн  суолталаах түгэнинэн буолла. Уһук Илиҥҥи эрэгийиэҥҥэ эдэр ыаллар дьиэнэн-уотунан хааччыллар кыһалҕаларын быһаарыыга биһиги өрөспүүбүлүкэбит киллэрбит көҕүлээһинин дойдубут Аҕа баһылыга өйөөтө. Сахабыт сирин бүттүүнүгэр эдэр ыаллар бу өйөбүлүнэн хайыы үйэ туһанар кыахтаннылар.

Хаарбах дьиэлэртэн көһөрүү киэҥ хабааннаахтык ыытыллар, өрөспүүбүлүкэ араас муннуктарыгар, ону тэҥэ, Арктикаҕа эмиэ саҥа эбийиэктэр – оҕо уһуйааннара, оскуолалар, култуура кииннэрэ, спорт саалалара үлэҕэ киирэллэр, суоллар, муосталар тутуллаллар! Бу барыта, олохпут тупсан иһэрэ хас биирдии киһиэхэ биллэр уонна көстөр диэн бигэ эрэллээхпин.

Кэлэр 2020 сылы Саха сиригэр Ийэ дойдуга бэриниилээх буолуу сылынан биллэрдим. Улуу Кыайыы 75 сылыгар аҕа көлүөнэбит эйэлээх олох туругурарын туһугар оҥорбут хорсун быһыыларынан киэн туттан туран, төрөөбүт өрөспүүбүлүкэбит уонна улуу Арассыыйабыт чэчирии сайдарыгар тус кылааппытын киллэрэргэ дьулуһуохтаахпыт. Дьиҥнээх патриотизм – бу бэйэҥ дьиэ кэргэҥҥэр, кэлэктиипкэр уонна төрөөбүт дойдугар таптал уонна эппиэтинэһи сүгүү.

Күндү биир дойдулаахтарым! Саҥа дьыл үтүө дьыалаларынан баай буоллун, хас биирдиигитигэр үрдүккэ дабайыыга уҕараабат кыаҕы, элбэх үөрүүлээх түгэни бэлэхтээтин, сырдык санааларгыт туоллуннар! Эһиэхэ чэгиэн доруобуйаны, этэҥҥэ буолууну, дьолу уонна ситиһиини  баҕарабын!

Хас биирдии дьиэ кэргэҥҥэ таптал уонна өйдөһүү баар буоллун, хас биирдии киһи чугас дьонун өйөбүлүгэр уонна истиҥ сыһыаныгар куустардын! Саҥа дьыл дьикти дьоллоох түгэнэ бука барыбыт сүрэҕэр ил гыннын!

Айсен Николаев

хаартыска sakhaday.ru

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

шестнадцать + три =