Ил Дархан Айсен Николаев: “Итэҕэйэбин, ситиһиини хамсатар күүс – билии. Биһиги бары үөрэниэх тустаахпыт. Сааһыттан тутулуга суох, бу хас биирдии олохтоох киһи үөрүйэҕэр кубулуйуохтаах”, — диэн Анал этиитигэр иһитиннэрдэ.
edersaas.ru
Ил Дархан олохтоох бэйэни салайыныыны, федеральнай научнай уонна үөрэтэр тэрилтэлэри кытта оҕотуттан оҕонньоругар тиийэ сайдар, кыаҕын олоххо киллэрэр туһугар бары услуобуйаны олохтуурга өрөспүүбүлүкэ Бырабыыталыстыбатыгар сорудахтаабыт.
Бары билэрбит курдук, соторутааҕыта Саха Өрөспүүбүлүкэтэ үөрэх хаачыстыбатынан 2024 сылга диэри 15 бастыҥ эрэгийиэн кэккэтигэр киириэхтээхпит диэн этэн турар. Бу сырыыга итини эмиэ бигэргэтэн иһитиннэрдэ. “Оҕо барыта талааннаах, айдарыылаах”, — диэн бэлиэтээтэ уонна кэлэр сылга Норуоттар икки ардыларынааҕы Арктика оскуолатын тутуута бүтүөҕүн, Өктөмҥө Наука Аччыгый академиятын базатыгар Талааннаах оҕолору өйүүр киин тутулла турарын, Табаҕаҕа айдарыылаах оҕолору кытта үлэлиир аан дойду ыстандаардынан сирдэтиллибит сылы эргиччи үлэлиир “Хотугу сулус” киин аһыллыаҕын иһитиннэрдэ.
Бу кииннэр ИТ-лиссиэйи кытта өрөспүүбүлүкэ оҕолоро бары саҥа билиини ылар уонна бэйэлэрин кыахтарын олоххо киллэрэр тэҥ хааччыйар тирэхтэринэн буолуоҕун ыйда. “Үөрэх эйгэтэ наука уонна технология тэтимигэр эппиэттиэхтээх. Ол иһин улахан болҕомто муниципальнай тэриллиилэргэ технопааркалары уонна үөрэх цифровой кииннэрин тэрийиигэ ууруллуоҕа”, — диэн эттэ. Оттон эрдэттэн идэҕэ туһаайыыны (профориентация) сөптөөхтүк тэрийэр инниттэн “Рабочая элита” диэн көҕүлүүр бырайыак саҕаланыан иһитиннэрдэ.
Өрөспүүбүлүкэ үрдүк үөрэҕин кыһалара аан дойду научнай-үөрэтэр кииннэрин кытта бииргэ үлэлэһиилэрин күүһүрдүөхтэрин наадатын ыйда. Бу Саха сирэ хаачыстыбалаах үөрэх биир кластерынан буолуон уонна киһи күүһүн (капитал) сайыннарыан эттэ.
Ил Дархан үөрэх тэрилтэлэрин тутуу боппуруоһун эмиэ тумнубата. Ол курдук, Саха сиригэр уһуйааны тутуу, федеральнай хааһына үбүнэн эмиэ, намтыа суоҕун, маныаха 3 млрд солк. угар былааннанарын биллэрдэ. Уонна саамай сүрүнэ, саҥа оскуолалар, бастатан туран, саахалланар туруктаахтар оннуларыгар тутуллуохтарын иһитиннэрдэ. Маныаха улахан болҕомто, оскуола тиийбэтин кыһалҕата сытыытык турарынан сибээстээн, Дьокуускай куоракка ууруллуон эттэ.
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриитэ.