Ил Дархан Айсен Николаев Орто Халыма улууһун баһылыга Евгений Слепцовы кытары көрүстэ. Ол курдук улуус социальнай-экономическай сайдыытын боппуруостарын тула кэпсэтии таҕыста.
edersaas.ru
Көрсүһүү кэмигэр Евгений Слепцов оройуоҥҥа билиҥҥи быһыы-майгы туһунан кэпсээтэ. Бастатан туран, баһылык улууска ойуур баһаардарын туһунан иһитиннэрии оҥордо.
— Үс нэһилиэнньэлээх пуун сиригэр-уотугар икки ый устата ойуур баһаардара турдулар. Термоточкалары умуруорар олус уустук. Олус киэҥ-куоҥ сиринэн тайаан сыталлар. Аны биир баһаары умуруордахха, тыал күүһүрэн атын сиргэ уот күөдьүйэр. Холобур, Сыбаатайга ааспыт нэдиэлэҕэ ардах түһүөн биир чаас иннинэ күүстээх тыал түһэн, баһаар үөһээнэн ыстанан, Алаһыай үрэх нөҥүө кытылыгар ыстаммыта. Дизельнэй станцияттан 500 м сиргэ баһаар туран, тута минерализованнай балаһа кэҥэтиллибитэ. Дьолго күүстээх ардах түһэн баһаар умуллубута, — диэн Евгений Слепцов кэпсээтэ.
Түгэнинэн туһанан, улуус баһылыга олохтоох нэһилиэнньэҕэ, доброволецтарга, ЫБММ бэрэстэбиитэллэригэр, быыһыыр-көрдүүр этэрээккэ, өрөспүүбүлүкэ салалтатыгар махталын биллэрдэ.
Салгыы улууска «Жилье и городская среда» национальнай бырайыак иитинэн, хаарбах туруктаах дьиэлэртэн көһөрүү боппуруоһа көтөҕүлүннэ. Евгений Слепцов былаан быһыытынан бу сылга 32 ыалга саҥа дьиэ ылалларыгар харчынан боруостааһын көрүллүөхтээҕин эттэ. 2021 сылга туһааннаах бырагырааманан дьиэни тутууга куонкурустар ыытыллыахтара. Биэс сыл устата 820 киһини, ол эбэтэр 300 ыалы көһөрүү былаана турар. 31 хаарбах туруктаах дьиэ көтүрүллүөхтээх.
Маны таһынан оройуоҥҥа аан бастакытын элбэх кыбартыыралаах саҥа таас дьиэ тутуллубутун эттэ. Бу тулаайах оҕолорго аналлаах дьиэ.
Көрсүһүү түмүгэр, Ил Дархан Айсен Николаев ойуур баһаардарын боппуруоһун кытаанах хонтуруолга ыларга эттэ. Итиэннэ сүрүн болҕомто хаарбах туруктаах олорор дьиэлэртэн көһөрүү боппуруоһугар ууруллуохтааҕын тоһоҕолоон бэлиэтээтэ.
edersaas.ru