СӨ Ил Дархана Айсен Николаев Орто Халымаҕа оробуочай сырыытыгар, элбэх функциялаах спортивнай комплекс тутуллуутун хаамыытын билистэ. Бу тутуу былаан быһыытынан, 2020 сыл төрдүс кыбаарталыгар үлэҕэ киириэхтээх.
Икки мэндиэмэннээх таас эбийиэк суумата 295,6 мөлүйүөн солкуобайтан үөһээ. Баараҕай тутууга бэлэмнэнии 2015 сылтан саҕаламмыт. Урут бу миэстэҕэ турбут хаарбах, аварийнай туруктаах дьиэлэри көтүрбүттэр.
Саҥа дьиэ бастакы мэндиэмэнигэр спортивнай саала, таҥас уларыттар сир, душтанар хостор, быраас кабинета, тириэньэрдэр хосторо уонна дьарыктанар саала былааннаналлар. Иккис мэндиэмэҥҥэ тустууктар эрчиллэр саалалара буолуохтаах.
Эбийиэк 54% бэлэм буолбут. Билигин толору хааччыллыытын оҥорорго үлэ салҕанар. Тутуу сорох матырыйааллара өрүһүнэн аҕалыллыахтаахтар.
Үлэни-хамнаһы көрөн-истэн баран, Айсен Николаев бу тутуу болдьоҕор бүтэригэр, Орто Халыма олохтоохторо манна астына-дуоһуйа сынньаналларыгар, спордунан дьарыктаналларыгар бары усулуобуйа тэриллэригэр эрэнэрин биллэрдэ.
СӨ Ил Дархан уонна бырабыыталыстыба пресс-сулууспата