Ил Дархан Айсен Николаев үөскээбит балаһыанньанан, урбаанньыттары өйдүүргэ, тулуйарга ыҥырда.
edersaas.ru
— Биллэн турар, ылыллыбыт миэрэлэр үчүгэйэ суохтар, ол эрээри өйдүүргүтүгэр уонна тулуйаргытыгар ыҥырабын. Дьиэҕэ олоруу, кэлиини-барыыны хааччахтааһын эрэ ыарыы тарҕанарын тохтотор кыахтаахтар, ол иһин кытаанах миэрэлэри киллэрэргэ күһэллэбит. Муус устар 6 күнүн кэнниттэн олохпут тутула сыыйа урукку чөлүгэр түһэн барыа диэн эрэнэбин, — диэн эттэ.
Ону тэҥэ, кулун тутар 28 күнүттэн саҕаланар уһун өрөбүллэргэ ханна да кэлбэккэ-барбакка, дьиэҕэ олорорго ыҥырда. Бу кэмҥэ үгүс тэрилтэлэр үлэлэрэ тохтотуллан, үлэһиттэр дьиэҕэ олоруохтаахтар, хамнастара төлөнөр. Ол эрээри, ордук урбаанньыттарга бу охсуулаах буолара өйдөнөр.
— Бу бэйэ-бэйэҕэ ыалдьыттаһар, сынньалаҥ күннэрэ буолбатахтар. Дьон дьиэҕэ бүгэн олордоҕуна, сырыы, кэлии-барыы тохтоотоҕуна эрэ ыарыы тарҕанарын бохсуохпут, бу нэһилиэнньэ доруобуйатын харыстыыр миэрэ. Бу маннык кытаанах миэрэлэр эрэ ыарыы тарҕанарын тохтотор кыахтаахтар. Онон түмсүүлээхпитин, эппиэтинэстээхпитин көрдөрөр кэммит кэллэ, — диэн Ил Дархан тоһоҕолоон бэлиэтээтэ.
Ангелина Васильева, “Саха сирэ” хаһыат, edersaas.ru