Ил Дархан харыйатыгар сэттэ сүүсчэкэ оҕо кэллэ

Ааптар: 
Бөлөххө киир:

Номнуо хаһыс даҕаны сылын Ил Дархан харыйатыгар өрөспүүбүлүкэ араас муннуктарыттан үөрэхтэригэр ситиһиилээх, олимпиадаларга, араас кэмпириэнсийэлэргэ, күрэхтэһиилэргэ кыайыылаах, миэстэлэспит 700 оҕо мустар. Циркэ дьиэтин киэҥ уораҕайа ыччатынан туолар.

edersaas.ru


Урутаан эттэххэ, бу Ил Дархан Айсен Николаев аан маҥнайгы харыйата буолар. Сүрүн харыйаҕа мустубут үөрэнээччилэринэн сирэйдээн, кини өрөспүүбүлүкэ бары оҕолорун Саҥа дьылынан эҕэрдэлээтэ. “Эһиги Саха сирин сайдыы үрдүкү үктэлигэр таһаарар дьон буолуоххутугар эрэнэбин. Онуоха эһиэхэ барыта баар – таптыыр төрөппүттэр, үчүгэй үөрэх, инникигэ дьулуһар баҕа санаа. Биһиги итини барытын өйүөхпүт. Саха сирэ үөрэххэ үгүс үбү-харчыны угар. Үөрэнэр баҕа санааҕыт хаһан даҕаны уҕараабатын. Өскөтүн киһи үөрэнэр, саҥаҕа, билбэтэҕин билэргэ талаһар буоллаҕына, бу киһиэхэ олоҕор барыта табыллыаҕа. Дьолу, ситиһиини”, — диэн санаатын тиэртэ.

Үөрэнээччилэр ааттарыттан махтал тылларын Дьокуускай куорат 5-с нүөмэрдээх оскуолатын үөрэнээччитэ, “Кэлэр кэм дипломаттара” куонкурус кыайыылааҕа Елизавета Никонова эттэ.

Тус бэйэм, үһүс сылбын Ил Дархан харыйатыгар сырыттым итиэннэ быйылгы тэрээһин ааспыт сыллардааҕар уратытык ааста диэн бэлиэтии көрдүм. Ол курдук, бастатан туран, Ил Дархан харыйатыгар кэлбит оҕолор олус сэргэхтэр, аһаҕастар. Киһи аҥаардас кинилэри көрөн үөрэр. Тэрийээччилэр быйыл остуоруйаны Г.Х.Андерсен “Снежная королева” айымньытынан туруорбуттар. Оҕолор хас биирдии мүччүргэннээх, сытыы түгэннэргэ ытыс таһынан, тэҥҥэ долгуйан, сороҕор үөрүүлэриттэн ыһыытаан-хаһыытаан даҕаны санааларын биллэрэллэр. Иккиһинэн, остуоруйаҕа кыттааччылар таҥастара ымпыгар-чымпыгар тиийэ толкуйдаммыт. Холобур, тымныы тыал кыргыттар таҥастара араас уотунан дьиримнии оонньуура көрүөхтэн эриэккэс. Дьиҥнээх остуоруйаттан түспүт дьон кэриэтэ! Үсүһүнэн, арена уота-күөһэ табыллыбыт. Аны циркэ эдэр үлэһиттэрин нүөмэрдэрэ сыллата тупсан, байан иһэр. Ити курдук, тэрээһин үгүс чаҕылхай өрүттэрин бэлиэтиэххэ сөп.

Ыраах Өймөкөөн улууһун Томтор оскуолатын 11-с кылааһын үөрэнээччитэ, “Саха сирэ” хаһыат биир дьоруойа, хоһоон ааҕан Арассыыйаҕа тиийэ миэстэлэспит, араас олимпиадалар кыайыылаахтара, призердара, СӨ бастакы бэрэсидьиэнэ М.Е.Николаев “Билиигинэн кыайыаҥ” анал истипиэндьийэтин лауреата, 11-с кылаас үөрэнээччитэ Сеня Атласов турарын көрөн, чугаһааппын кытта билэн дорооболоһор. «Учууталларбар махтаныам этэ, улахан ситиһиилэрдээх диэн Ил Дархан харыйатыгар кэлэрбин өйөөтүлэр. Кыра эрдэхпиттэн ыра санаам дьэ туолла. Улууспутуттан тохсуо буолан кэллибит. “Бэс Чагда” сынньалаҥ киинигэр түһэрдилэр. Уруккуттан билэр оҕолорум эмиэ кэлбиттэр. Уус Маайа уолаттарын кытта билистим. “Елки” киинэни көрдүбүт, “Арассыыйа – мин историям” түмэлгэ сырыттыбыт. Барыта аныгылыы, кэпсииллэрэ да интэриэһинэй. Ил Дархан харчы биэрэр үһү диэн истибитим. Дьонум, үөрэххэ туттарсаргар уурун дииллэр. Оннук гынар санаалаахпын», — диэн үөрүүтүн үллэстэр.

Людмила ПОПОВА, “Саха сирэ” хаһыат, edersaas.ru

Мария ВАСИЛЬЕВА (СИА), ааптар хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0