Ил Дархан Айсен Николаев бэҕэһээ, балаҕан ыйын 9 күнүгэр, өрөспүүбүлүкэ эдэр худуоһунньуктарын кытары көрсүбүтүн туһунан инстаграмҥа бэйэтин страницатыгар суруйда.
«Саха сиригэр саамай сыаналыырбыт — дьоммут. Маннык этэрбиттэн салгыбаппын. Айар дьоҕурдаах, көхтөөх, саҥаны арыйарга, оҥорорго, ситиһэргэ бэлэмнэр. Бүгүн Дьокуускай эдэр худуоһунньуктарын кытары көрүстүм. Кинилэр бырайыактара элбэх. Холобур, куорат устун сылдьан стрит-арт хайысханан үлэлэрин куруук көрөбүт», — диэн суруйар Айсен Николаев.
Эдэр худуоһунньуктар элбэх интэриэһинэй бырайыактаахтар, ол иһигэр стрит-арт. Онлайн-бырайыактар эмиэ бааллар. Ол курдук, «Факты о Якутии» True-yakutiya.ru, «саха норуотун уонна Саха сирин устуоруйатыттан интэриэһинэй чахчылар».
Ил Дархан эппитинэн, өрөспүүбүлүкэбит столицата Арассыыйа түөрт саамай эдэр куораттарын ахсааныгар киирсэр, Дьокуускайга олорор дьон орто саастара — отут. «Төһөнөн элбэх эдэр ыччат баар да, куорат олоҕо соччонон сэргэх, көхтөөх, инникилээх», — диэн эбэн этэр.
«Саха сирин туһунан элбэх киһи, ордук эдэрдэр билбэттэр. Баччааҥҥа диэри биһиэхэ табанан айанныылларын, мэлдьи олус тымныы уонна дьахталлар бука бары алмааска сөтүөлүү сылдьалларын курдук өйдөбүллээхтэр. Итинник өйдөбүлү тохтотуохха наада. Оттон оонньуу ньымата итиннэ олус бэрт. Биһиги бэйэбит кэммитигэр «383 факта о Якутске» диэни бэчээттээн турабыт, оттон манна аныгы ньыманан көрүөххэ. Сайдарга куруук инниҥ диэки хамсыыр олус наада. Кэпсэтэн баран, бу да сырыыга, маннык кыаҕынан барыта ситиһиллиэн сөп эбит диэн итэҕэйдим!» — диэн Айсен Николаев эрэнэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата