Ил Дархан: «Андрей Владимирович уопуттаах салайааччы»

Бөлөххө киир:

Бүгүн, от ыйын 31 күнүгэр, Ил Дархан Айсен Николаев  СӨ бырабыыталыстыбатын бэрэссэдээтэлин эбээһинэһин толорооччу Андрей Тарасенконы СӨ бырабыыталыстыбатыгар билиһиннэриэҕэ.

edersaas.ru

Санатан эттэххэ, аҕыйах хонуктааҕыта Ил Дархан Айсен Николаев «Саха» НКИХ ханаалынан быһа эфиргэ тахсарыгар, бу күннэргэ премьер эбээһинээһин толорооччу биллиэхтээҕин туһунан эппитэ.

Айсен Сергеевич инстаграмҥа страницатыгар: «Андрей Владимирович уопуттаах салайааччы, Уһук Илин киһитэ, улахан судаарыстыбаннай корпорацияларга, федеральнай уонна региональнай былаас уорганнарыгар үлэлээбит уопуттаах салайааччы.  Андрей  Владимировиһы уруккуттан билэр  киһим.  Чиэһинэй, киэҥ билиилээх салайааччы, үлэни көдьүүстээхтик тэрийэр киһи. Өрөспүүбүлүкэ уонна дойдубут сайдыытыгар дьоһун кылаатын киллэриэ диэн бүк эрэллээхпин», — диэн суруйда.

https://www.instagram.com/p/CDSopP5Ji70/

Андрей Тарасенко бу иннинэ Муора уонна өрүс тырааныспарын Федеральнай агентствотын салайааччытын солбуйааччытынан үлэлээбитэ.

ЫСПЫРААПКА:

Андрей Тарасенко  1963 сыллаахха атырдьах ыйын 9 күнүгэр Владивосток куоракка  төрөөбүтэ.   1985 сыллаахха Ленинград куоракка Ленинскэй хомсомуол аатынан үрдүкү байыаннай-муора училищетын бүтэрбитэ.

1997 — 2005 сс. балыгы бултуур салаа судаарыстыбаннай тэрилтэлэригэр уонна хампаанньаларыгар салайар дуоһунастарга үлэлээбитэ.

2005 сыллаахха айылҕаны туһаныыга уонна агропромышленнай тиһиккэ  федеральнай үбү-харчыны ороскуоттааһыны хонтуруоллуур иниспиэксийэтин начаалынньыгын солбуйааччыта.

2007 сыллаахха Атомнай энергия Федеральнай агентствотын административнай хааччыйыыга уонна  дьыалаларыгар управлениетын начаалынньыгын солбуйааччы. Салгыы «Росатом» ГК баайга-дуолга   департаменын дириэктэрин солбуйааччы.

2010 — 2012 сс. «Россельхозбаан» ААУо кылаабынай экэнэмииһинэн, онтон баан бырабылыанньатын бэрэccэдээтэлин сүбэһитинэн үлэлээбитэ.

2012 сыл кулун тутарыттан 2013 сыл бэс ыйыгар диэри  Уу ресурсаларын федеральнай агентствотын Невско-Ладожскайдааҕы бассейновай управлениетын салайааччытын солбуйааччытынан, онтон салайааччытынан үлэлээбитэ.

2013 сылтан «Росморпорт» ФГУП салайааччыта.

2017 сыл алтынньы 4 күнүттэн 2018 сыл балаҕан ыйын 26 күнүгэр диэри Приморскай кыраай губернаторын эбээһинэһин толорооччу. 2018 сыл балаҕан ыйын 27 күнүттэн РФ Бырабыыталыстыбатын дьаһалынан Муора уонна өрүс тырааныспарын салайааччытын солбуйааччытынан анаммыта.

edersaas.ru

+1
0
+1
0
+1
0
+1
0
+1
0
+1
0
+1
0