Бүгүн, от ыйын 1 күнүгэр, Саха Өрөспүүбүлүкэтин Ил Дархана Айсен Николаев анал этиилээх эпииргэ таҕыста.
Ил Дархан Айсен Николаев:
— Күндү доҕоттор! От ыйын 1 күнүгэр устуоруйаҕа киирэр, судаарыстыбабыт сайдыытыгар тосту уларытыылаах түгэн тосхойдо – дойду бүтүннүүтүгэр уонна өрөспүүбүлүкэбитигэр курдук, үгүс быыбардааччылар Арассыыйа Федерациятын Конституциятыгар уларытыылары киллэрэр иһин куоластаатылар. Биһиэхэ, Саха сиригэр, Конституцияҕа уларытыылары өйөөһүҥҥэ куоластааһын ситиһиилээхтик, ханнык да үҥсүүтэ уонна кэһиилэрэ суох ааста – 820 учаастак үлэлээн, өрөспүүбүлүкэ үрдүнэн кыттыы 55,56 бырыһыаҥҥа тэҥнэстэ.
Мин бэйэлэрин гражданин быһыытынан иэстэрин толорон, быыбардыыр учаастакка тус санааларын биллэрэ кэлбит дьоҥҥо махтанабын уонна уларытыылары киллэрэр туһугар куоластаабыт дьоҥҥо анаан-минээн махтанабын. Судаарыстыбаны бөҕөргөтүү уонна көннөрү дьон бырааптарын көмүскээһин туһаайыытын туһугар!
Эһиги быһаччы көмөҕүтүнэн биһиги саҥардыллыбыт дойдуга уһугуннубут – сүрүн сокуоммутугар билигин аан дойдутааҕы бырааптааҕар Арассыыйа быраабыгар уһулуччу суолта, Арассыыйа суверенитетын уонна сирэ-уота бүтүн буолуутун көмүскээһин бэриллэн бигэргэннэ. Устуоруйа кырдьыгын көмүскээһин, Арассыыйа бары норуоттарын төрүт култуураларын уонна тылларын сайыннарыы, ураты айылҕабытын чөл хаалларыы.
Миэхэ эрэгийиэн баһылыгын быһыытынан Төрүт Сокуоҥҥа саҥа балаһыанньалар ис хоһоонноро – бу хас биирдии киһиэхэ ытыктабыллаах сыһыан уонна дьон олоҕун уйгутун үрдэтии. Оҕолор, оҕолоох ыаллар, бары үлэлиир дьон, биэнсийэлээхтэр бырааптара көмүскэллээх буолла. Судаарыстыба биэнсийэни, босуобуйаны уонна атын социальнай төлөбүрдэри сыллата булгуччулаахтык индексациялыырга эрэннэрэр. Бары гражданнарга булгуччулаах социальнай страховкалааһын, үрдүк хаачыстыбалаах мэдиссиинэ көмөтүнэн туһаныы мэктиэлэнэр. Бу судаарыстыба гражданнарга социальнай мэктиэлээһиннэрэ, дойду экэниэмикэтэ үүнүүтүгэр кууруһу тутуһуу уонна дьон олоҕун таһымын үрдэтии мэлдьи инники күөҥҥэ тутуллуохтара.
Билигин биһигини миэстэлэргэ саҥардыллыбыт Конституцияны олоххо киллэрэр үлэ күүтэр.
Женни Стрюкова, edersaas.ru