Ил Дархан хааччахтааһын эрэсиимин устуу бэс ыйын 15 күнүттэн саҕаланыаҕын эттэ
Бүгүн Ил Дархан Айсен Николаев тэлэбиисэринэн быһа сибээскэ тахсан, коронавируһу бохсууга үлэ уонна хааччахтааһыны устуу түһүмэхтэрин билиһиннэрдэ.
edersaas.ru
“Коронавируһу бохсууга өрөспүүбүлүкэ резервнэй фондаттан миллиардан тахса сууманы ыытта. Улуустарга уонна Дьокуускай куоракка инфекционнай стационардары астыбыт. Коронавирустаах дьоҥҥо 1500 тиийэ куойканы бэлэмнээтибит, олору бары ирдэнэр тэрилинэн хааччыйдыбыт. 1100-тэн тахса мэдиссиинэ үлэһитэ – быраастар, сиэстэрэлэр, санитардар бу кэм тухары бэйэлэрин харыстаммакка, оҕолоруттан-урууларыттан тэйэн, туох баар күүстэрин ыарыһахтары эмтиир туһугар үлэлииллэр”, — диэн эттэ.
Бэс ыйын 4 күнүттэн ыарыы тарҕаныытын коэффициена бииртэн тахса илигин, бу Роспотребнадзор хааччахтааһыны устуу саҕаланыытыгар суолталаах ирдэбил буоларын ыйда.
Ил Дархан: “Өрөспүүбүлүкэ бастакы уонна иккис бөлөхтөрүгэр, Арктика улуустарыгар уонна тыа сирдэригэр хааччахтааһын эрдэ уһуллубут сирдэригэр туох даҕаны уларыйбат. Оттон дьиэҕэ олоруу эрэсиимэ баар куораттарга уонна бөһүөлэктэргэ бэс ыйын 15 күнүттэн сыыйа бытовой өҥө (парикмахерскай, салоннар, косметическай уонна СПА-кииннэр, массаж кэбиниэттэрэ) аһыллыахтара. Бары эрдэттэн суруйан, санитарнай нуорманы барытын тутуһан үлэлиэхтэрэ. Элбэх кыбартыыралаах дьиэлэргэ баар маҕаһыыннар арыллыахтара. Олор булгуччу туспа ааннаах буолуохтаах, социальнай дистанция тутуһуллуохтаах, биир атыылаһааччыга кырата 4 кв.м. иэн тиксэр буолуохтаах. Мааскалаах сылдьыы эрэсиимэ булгуччулаах. Хааччаҕы устуу сыыйа тэрээһинэ ити курдук”, — диэн “сымнатыы” бастакы түһүмэҕин билиһиннэрдэ.
Бэс ыйын 22 күнүттэн сайыҥҥы кафелары, атыы кииннэрин аһар, уопсастыбаннай тырааныспары барытын (муниципаллар икки ардыларынааҕы сырыылары киллэрэн туран) үлэлэтэр былаан баарын эттэ.
Атын эрэгийиэннэртэн кэлээччилэр син биир 2 нэдиэлэ устата дьиэҕэ олоруу эрэсиимин тутуһуохтаахтаахтарын ыйда.
Хааччаҕы устуу үһүс түһүмэҕэ ыарыы таһыма олоччу түстэҕинэ ылыллыаҕын, бу бэс ыйын 22 күнүн кэнниттэн буолуоҕун иһитиннэрдэ.
Людмила ПОПОВА, “Саха сирэ” хаһыат, edersaas.ru