Ил Дархан Айсен Николаев Улуу Кыайыыны уһансыбыт сэрии бэтэрээннэрин кытары “Тыгын Дархан” эрэстэрээҥҥэ көрүстэ.
—Уонча сыллааҕыта, бырабыыталыстыба дьаһалтатын салайар кэммэр, өрөспүүбүлүкэҕэ тыһыынча кэриҥэ сэрии бэтэрээнэ баара. Билигин сүүс буолан хааллыгыт. Онон, эһигиттэн көрдөһөбүн, доруобай буолуҥ, үүнэр көлүөнэҕэ холобур буолан, уһуннук олоруҥ. Эһиги биһиги ортобутугар бааргыт — олоҕу суолталаах оҥорор, үлэлииргэ, айарга-тутарга көҕүлүүр.
“Сэрии кэмин оҕолорун тустарынан” сокуон ылылынна. 25 тыһыынча киһи бу статуска хапсар. Ыам ыйын 9 күнүттэн өрөспүүбүлүкэҕэ Улуу Кыайыы сылын биллэрдим. Бу сыл эйэлээх олоҕу аҕалбыт буойуннар ааттарын үйэтитиигэ, үүнэр көлүөнэни кинилэр хорсун быһыыларын өйдөтүүгэ-иитиигэ ананыаҕа. Эһиги иннигитигэр биһиги улахан ытык иэстээхпит. Эһиги турууласпыт эйэлээх халлааҥҥыт анныгар, мөлүйүөнүнэн дьон тыыннарын толук уурбут олохторун салгыах, дойдубутун сайыннарыах, тиргиччи үлэлиэх-хамсыах тустаахпыт, — диэн туран, Улуу Кыайыы туһугар тост көтөхтөрдө.
Ил Дархан спикерэ Петр Гоголев кэргэнин эһэтэ, аатырбыт буойун Феодосий Донской этэр тылларын тиэртэ: “Сэрии диэн ынырык тыл, хаһан да сэрии диэни билимэҥ!”. Ону тэҥэ, Саха сирин 10 снайпера 2 тыһыынча кэриҥэ өстөөҕү суох гыммыттарын санатта.
Мэр Сардаана Авксентьева икки эһэтэ Сталинград иһин кыргыһыыга охтубуттар. Хас биирдии дьиэ кэргэни сэрии ыар тыына хаарыйбыта диэн туран, үүнэр көлүөнэ ити хорсун быһыыны умнубатыгар эппиэтинэһи сүгэбит диэн эттэ.
Ангелина Васильева, “Саха сирэ” хаһыат, edersaas.ru