Ытыктабыллаах Саха Сирин олохтоохторо!
Саха Өрөспүүбүлүкэтин салалтатын уонна тус бэйэм ааппыттан эhигини саха норуотун героическай эпоhа Олоҥхо күнүнэн итиитик-истиҥник эҕэрдэлиибин!
Yгүс үйэлэр усталарыгар биһиги олоҥхобутун өрө тутан, өбүгэлэрбит хайдах хаалларбыттарынан харыстаан илдьэ кэллибит. Өбүгэ саҕаттан Олоҥхо биһиги норуоппут өркөн өйүн, философиятын, айылҕаҕа уонна дьоҥҥо сыһыанын, иллээх-эйэлээх олоххо тардыһыытын, кыайыыга-хотууга, кэрэҕэ-сырдыкка дьулуурун туоһулуур. Саха норуотун киэн туттуута – Олоҥхо, ис хоһоонунан, баай тылынан, ураты уһун толоруутунан аан дойду олохтоохторун сөхтөрүөн сөхтөрөр, саха төрүт культуратын, духуобунай сыаннастарын аар-саарга аатырдар.
13 сыл анараа өттүгэр, 2005 сыл сэтинньи 25-с күнүгэр ЮНЕСКО Олоҥхону аан дойду норуоттарын тылынан уус-уран бастыҥ айымньытынан билиммитэ. Ол кэмтэн ыла олоҥхону харыстааһыҥҥа, үөрэтиигэ, тарҕатыыга, араас омук тылыгар тылбаастааhыҥҥа, аныгы технологиялары туhанан үйэтитиигэ дьоhуннаах үлэ саҕаламмыта.
Билигин өрөспүүбүлүкэҕэ саха норуотун дэҥҥэ көстөр культурнай нэһилиэстибэтин – Олоҥхону салгыы сайыннарыыга, үөрэтиигэ, кэнэҕэски көлүөнэҕэ чөл тиэрдиигэ, аан дойдуга тарҕатыыга туhуламмыт үлэ былааннаахтык ыытыллар. Бу үгүс өрүттээх үлэ биир сүрүн хайысхатынан Олоҥхо Ыһыаҕын тэрийии итиэннэ сыллата сэтинньигэ Олоҥхо күнүн бэлиэтээhин иитинэн анал декаданы тэрийии буолар.
Аан дойду үрдүнэн саха норуотун уус-уран айымньытыгар интэриэс уонна болҕомто күнтэн күн улаатан иhэр. Улуу убайбыт Былатыан Ойуунускай суруйбут «Туйаарыма Куо» олоҥхотунан туруоруллубут испэктээги соторутааҕыта Саха Сирин олохтоохторугар Кытай Пекин куоратын Куньцюй опера театра улахан сыанаҕа сүрэхтээбитэ да элбэҕи этэр.
Аныгы сыыдам сырыылаах да үйэ кэмигэр Олоҥхо бэйэтин уhулуччу суолтатын, дириҥ ис хоhоонун, олоххо, дьоҥҥо-сэргэҕэ, айылҕаҕа, төрөөбүт дойдуга сыhыан киэҥ өйдөбүллэрин ыhыктыбакка бэйэтигэр илдьэ сылдьара кэрэхсэбиллээх. Билигин кырачааннар уhуйаантан саҕалаан төрөөбүт тыл сүөгэйин сүмэтин олоҥхо нөҥүө иҥэринэллэр, симэлийбэт тутаах өйдөбүллэри билэ улааталлар.
Күндү доҕоттор! Өбүгэлэрбит кэс тылларын энчирэппэккэ, төрүт культурабытын харыстыырга, байытыыга, кэнчээри ыччакка чөл тиэрдиигэ дьулуhуоҕуҥ! Төрөөбүт дойдубут чэчирии сайдарын туhугар кыhаллыаҕыҥ!