Уус Алдан улууһун Түүлээх нэһилиэгэ Арассыыйа президенин граныгар кыттан кыайан, 500 тыһыынча солкуобайы ылбыттарын туһунан сурах кэлбитэ. Бу гран харчытынан нэһилиэккэ ийэ искибиэрэ тутуллар үһү диэн буолта.
Станислав Винокуров, Түүлээх нэһилиэгин баһылыга:
— Уус Алдан улууһун иһинэн үлэлиир уопсастыбаннай түмсүү бу граҥҥа тигистэ. Биһиги нэһилиэкпит кийиитэ Нина Винокурова, идэтинэн математика учуутала граҥҥа үлэлэстэ. Искибиэр тутулларыгар сир анаан биэрдибит. Хадатаайыстыба сурулунна. Онон Ийэ дойдуга бэриниилээх буолуу сылыгар нэһилиэкпитигэр саҥа искибиэр тутуллара күүтүллэр. Мрамор билиитэлэрдээх, аҥаарыгар оҕолорго аналлаах
былаһааккалаах сэргэх тутуу буолуохтаах.
Нина Винокурова, Дьокуускай куорат 23 №-дээх оскуолатын математикаҕа учуутала:
— Громова Мария Романовна диэн Түүлээх нэһилиэгин дьоруой ийэ кийиитэ буолабын. Түүлээх нэһилиэгэ наһаа кытыы сиргэ турар, суола-ииһэ суох нэһилиэк буолар. Төрөөбүт дойдубутугар тугу эмит көмөлөспүт, үтүөнү оҥорбут киһи диэн санааттан биһиги, бу дьоруой ийэ оҕолоро хамаанда тэринэн, Президент граныгар
кыттарга санаммыппыт. Оттон грант НКО эрэ аатыттан бэриллиэхтээх. Ол иһин, биһиги Уус Алдан улууһун ыччатын уонна дьиэ кэргэнин аатыттан, Сторожева Виктория өйөөн, сайаапка суруйан түһэрбиппит. Маны таһынан, нэһилиэк иһинэн хаартыска хомуйуутугар сыалай хамыыһыйа тэриллибитэ. Оҕо саадын
сэбиэдэссэйэ Семенова Анна Ильинична, олохтоох бибилэтиэкэр Ушницкая Туйаара Михайловна, оскуола бибилэтиэкэрэ Саввина Светлана Михайловна уонна аҕам саастаахтартан Афанасьева Марфа Семеновна көмөлөспүттэрэ. Бу бырайыагы толкуйдаан сайаапка биэрбит дьон сэттиэбит, кэргэним Алексей Винокуров, кыыспыт Слепцова Анастасия Москваҕа олорор, кини сайтпыт, бырайыакпыт өттүгэр эппиэтинэһи сүгэр. Маны сэргэ, Түүлээххэ олорор оскуола харабыла Иван Винокуров бу идиэйэни көтөхпүтэ. Сүрүн тэрили эҥин туруоруу үлэтин Винокуров Владимир оҥорор. Кини түөрт оҕолоох, хачыгаарынан
үлэлиир. Винокурова Евдокия искибиэри сибэккинэн киэргэтиэхтээх, Мария Винокурова туох баар тэрээһиннэрбитигэр эппиэтинэстээх, үлэ хаамыытын хамсатар сүрүн дьоммут буолаллар.
Патриотизм сылын көрсө баҕа санаабыт туолан эрэриттэн наһаа үөрэбит. Маннык грант баара олус табыгастаах эбит. Күүстээх санаалаах буолуохха наада эбит. Бу бастакы холонуубут буолан арыый
кыра суумаҕа суруйбуппун дуу дии саныыбын. Дьиҥэ, ол пуонда экспердэрэ сүрдээх үрдүк сыанабылы биэрбиттэр. Ол курдук 100-тэн 72,5 баалы биэрбиттэр. Ону сэргэ, биир дойдулаахтарбыт 296 тыһыынчаны уу харчынан көмлөстүлэр. Онон сүрдээх кэрэ көстүүлээх искибиэр Түүлээх нэһилиэгэр тутуллуо диэн
эрэнэбит.
Искибиэр арыллыыта ыам ыйын 15 күнүгэр былааннанар. Бу күн таптал уонна эрэллээх буолуу күнэ, ол иһин талбыппыт. От ыйын 8 күнүгэр уһуннук бииргэ олорбут дьиэ кэргэттэри чиэстиэхпит. Кэлэр кыһын нэһилиэк иһинэн хаар-муус оҥоһуктарга куонкурус тэрийиэхпит. Дьэ, онон инникигэ былааммыт киэҥ. Тус
бэйэм бу бырайыак нөҥүө элбэҕи биллим. Кыракый нэһилиэк дьоно хайдах курдук талааннаахтарын, түмсүүлээхтэрин наһаа сөхтүм.
Ульяна ЗАХАРОВА.
Хаартыскалар: Уус Алдан Түүлээх нэһилиэгин дьаһалтата
+1
+1
+1
+1
+1
+1
+1