Бу күннэргэ Кэбээйитээҕи «Сайдам» норуот айымньытын киинэ Улуу Кыайыы 75 сыллаах үбүлүөйүнэн, Ийэ дойдуга бэриниилээх буолуу сылыгар анаммыт хоһоон күрэһин тэрийэн ыытта.
edersaas.ru
Ийэ айылҕаны хоһуйуу, оҕону-ыччаты патриотическай тыыҥҥа иитии, аҕа көлүөнэ үтүө холобурун үйэтитэр соруктаах «Кыайыы өрөгөйө» диэн хоһоон күрэһигэр улуус нэһилиэктэриттэн олохтоох ааптардар уонна хоһоон суруйуутугар холонор оскуола оҕолоро кыттыыны ыллылар.
Дьүүллүүр сүбэҕэ СӨ суруйааччыларын сойууһун чилиэнэ Иосиф Кобяков, СӨ култууратын туйгуна, өрөспүүбүлүкэ култууратын үтүөлээх үлэһитэ Савелий Тимофеев уонна бибилэтиэкэр Светлана Оконешникова үлэлээн, ааптардар хоһооннорун ырыттылар.
Күрэс түмүгүнэн оскуола оҕолоругар кыайыылаах аатын Кэбээйи орто оскуолатын 5 «А» кылааһын үөрэнээччитэ Сандаара Софронеева ылла. Кини саха тылын учуутала Мария Павлова салайыытынан «Сэрии сыллара» диэн ааттаах хоһоону суруйбут.
Улахан дьоҥҥо Куокуй нэһилиэгин олохтоох ааптара Геннадий Иванов «Өлүүнү кыайбыттар» хоһоонунан кыайыылааҕынан таҕыста.
Күрэс инстаграм ситимин нөҥүө куоластааһыннаах буолла. Онно эмиэ Мария Павлова уһуйбут оҕото Сайаана Терехова кыайда. Сайаана «Мин төрөөбүт дойдум» хоһоонун куйаар ситимигэр таһаарда. Ааптар 5 «А» кылааска үөрэнэр.
Ити курдук, саастарынан хааччахтаабакка, Ийэ дойдуга бэриниилээх буолуу сылыгар көлүөнэлэри ситимниир маннык күрэстэр олус наадалара көһүннэ.
«Саха сирэ» хаһыат, edersaas.ru анаан
Татьяна МАКСИМОВА-ЛАЗАРЕВА,
Кэбээйи улууһа.