Бу күннэргэ “Сыл иитээччитэ-2019” өрөспүүбүлүкэтээҕи куонкурус буола турар. Саха сирин улуустарыттан уонна Дьокуускай куораттан, уопсайа, 25 педагог кытынна. Бэҕэһээ 11 лауреат СӨ үөрэҕин уонна наукатын миниистирэ Владимир Егоровы уонна Бүтүн Арассыыйатааҕы “Сыл иитээччитэ-2018” куонкурус муҥутуур кыайыылааҕа, Химки куорат уһуйаанын иитээччитэ Анастасия Шлемкону кытта “Профессиональнай кэпсэтии” ток-шоуга кытыннылар.
edersaas.ru
Бэҕэһээ куонкурус үһүс бүтэһик түһүмэҕэ ааста. Лауреаттар сарсыардаттан “Мин ситиһиилээх бырайыагым” дакылаат-презентация оҥордулар. Кырачааннары кытта үлэлиир педагогтар муҥура суох талааннаахтара уруккуттан биллэр. Бу да сырыыга араас интэриэһинэй бырайыактарын кэпсээтилэр.
Күн иккис аҥарыгар “Профессиональнай кэпсэтии” ток-шоуга кытыннылар. Тэрээһини СӨ үөрэҕин уонна наукатын миниистирэ, дьүүллүүр сүбэ бэрэссэдээтэлэ Владимир Егоров уонна ыҥырыылаах ыалдьыт, дьүүллүүр сүбэ чилиэнэ, Бүтүн Арассыыйатааҕы “Сыл иитээччитэ-2018” куонкурус муҥутуур кыайыылааҕа, Химки куорат (Москва уобалаһа) уһуйаанын иитээччитэ Анастасия Шлемко ыыттылар. Кэпсэтии үөрэх тиэмэтин тула барда. Ол курдук, тоҕо иитээччи идэтин талбыттарын, аныгы оҕону иитиигэ туохха болҕомтону ууруохха сөбүн, уһуйаан туохха үөрэтиэхтээҕин, туох уларытыыны киллэриэххэ сөбүн, “Сыл иитээччитэ” куонкуруска тугу эбиэххэ-сабыахха сөбүн, о.д.а. ыйытыыларга санааларын үллэһиннилэр.
Санатан эттэххэ, бу инннинэ бэйэни билиһиннэрэр презентация, оҕолору кытта дьарык, маастар-кылаастар буолбуттара. Өрөспүүбүлүкэтээҕи “Сыл иитээччитэ-2019” куонкурус муҥутуур кыайыылааҕын аата бүгүн, тэрээһин үөрүүлээх сабыллыытын кэмигэр биллиэҕэ. Кыайыылаах Арассыыйатааҕы куонкуруска Саха сирин аатын көмүскүүр чиэскэ тиксиэҕэ.
Людмила ПОПОВА, “Саха сирэ” хаһыат, edersaas.ru