«Hyundai solaris» массыына Хаҥаласка айаннаата («Дыгын оонньуулара»: хаартыска, видео)

Ааптар: 
Бөлөххө киир:

Бэс ыйын 24-25 күннэригэр ыытыллыбыт «Дыгын оонньуулара» сахалыы многоборьеҕа күрэхтэһии түмүктэннэ. Икки күннээх тыҥааһыннаах киирсии түмүгүнэн, үһүс миэстэни Усуйаана бөҕөһө Алексей Козлов ситистэ уонна матасыыкыл бирииһинэн наҕараадаланна. Иккис бочуоттаах миэстэни Нам Түбэтиттэн сылдьар Артем Варданян ылла уонна Regolmoto матасыыкыл хаһаайынынан буолла.

Муҥутуур кыайыылааҕынан уонна иккис сылын өрөспүүбүлүкэ бастыҥ многобореһа буоларын бигэргэппит Егор Филиппов Нyundai solaris массыынаны Хаҥалас улууһугар сүүрдэн барда.


Белолюбскай бүтэһик «Дыгына»

— Быйыл кыайардыы диэн буолбакка, дуоһуйуу ылар туһугар кииристим. 1997 с. киирсэбин. Ол тухары сэттэтэ чөмпүйүөннээбитим, түөртэ иккис миэстэ буолбутум. Быйыл уон алтыс төгүлүн кытынным.  Быйыл сүүмэрдиир түһүмэҕи барыларын кытта тэҥҥэ ааһан кытынным. 40 саастаахпын, быйыл 20 сыл буолар спорка кэлбитим. Сылы быһа дьарыктанным. 2012 сыллаахха бүтэн, сэттэтэ кыайан, Николай Дьяконов алтата кыайбыт рекордун куоһаран баран тохтообутум. Сылайбытым. Ыйааһыным 105 кг. буолбута, мас тардыһыытыгар Аан дойду кубогар муҥутуур кыайыылаах буолбутум.  Ол кэннэ, былырыын саҥаттан баҕатыйан туран кыттыбытым. Ыйааһыммын төттөрү түһэрбитим — билигин 84 киилэлээхпин. Улахан ыйааһыннаах киһи многоборьеҕа барсыбат. Манна тэҥинэн күүстээх, имигэс, сымса, кыраҕы харахтаах буолуохха наада. Көрөөччүлэр энергетикалара күүстээх, спортсменнары угуйар. Мин эмиэ ол энергетиканы ахтан, баччаҕа диэри киирсэн кэллим. 

Мин үөрэнээччим Егор Филиппов быйыл иккис төгүлүн бастаата. Алексей Козлов — икки төгүллээх призер. Биэс үөрэнээччим кииристэ — Егор Филиппов, Алексей Козлов, Николай Матаннанов, Дьулустаан Ноговицын, Иннокентий Миронов. Чэпчэкитик кииристим, улаханнык ыгыллыбакка-түүрүллүбэккэ. Уруккум курдук азарт суох. Уолаттарбын харыстыыбын, сүбэлиибин эрээри, тэҥҥэ киирсэбин. Тус бэйэлэрэ барытын чиэһинэйдик кыайыахтаахтар дии саныыбын.


 Дыгын оонньууларын рекордара:

Таас көтөҕүүтүгэр Дьулустаан Ноговицын (Горнай) быйыл былырыыҥҥы рекордун тупсарда. Кини 116 киилэлээх тааһы көтөхпүтүнэн 203. 50 м. барда.

Егор Филиппов (Хаҥалас) оҕунан ытыыга 59 очкону ылан, былырыыҥҥы рекордун тупсарда.

«Дыгыҥҥа» Hyindai Solaris массыынаны туруордулар

Хаартыска: Айаал Черноградскай, Николай Попов,
Видео: «Саха» НКИХ

+1
0
+1
0
+1
0
+1
0
+1
0
+1
0
+1
0