Аммаҕа урбаанньыт Светлана Крюкова алтыс сылын үлэлэтэр «Хотууна» диэн маҕаһыынын олохтоохтор ыраас, аһа минньигэс, сибиэһэй, үлэһиттэрэ эйэҕэстэр диэн хайҕыыллар.
edersaas.ru.
Улуустааҕы балыыһа реанимация, терапия отделениеларыгар уонна процедурнай кэбиниэккэ сиэстэрэнэн үлэлээбит Светлана Крюкова биэнсийэҕэ тахсан баран, кэллиэгэтэ Ирина Кузнецовалыын «Сладкий остров» кафены арыйбыта. Онтон үлэлиэххэ сөп эбит диэн, 2015 с. бэйэтин дьыалатын саҕалаабыта. Бастаан чааһынай дьиэни куортамнаһан, салгыы Николай Захаров аатынан уулуссаҕа дьиэ атыылаһан, уонча киһилээх кэлэктииби салайан үлэлиир.
Алена Алексеева духуопкаҕа бурдук аһы буһарар, Татьяна Ефимова тус үлэтин таһынан туорт арааһын оҥорор, Мария Тимофеева салааты оҥорор, эт аһылыгы, пиццаны буһарар. Технология учуутала идэлээх эдэр асчыт Александра Иванова бэрэскини, чебурегы, беляһы, тиэстэлээх сосисканы астыыр. Асчыт Марианна Чабыкина, кондитер көмөлөһөөччүтэ Дария Макарова, иһит сууйааччы Анна Федорова куукуна тутаах үлэһиттэрэ буолаллар. Маны таһынан икки оһох оттооччу үлэлиир. Аламаҕай майгылаах эдэр атыылааччы Анна Максимова идэтин сөбүлүүр буолан, төрдүс сылын үлэлиир.
—Олохтоох чааһынай дьон сүөһүтүн этэ сороҕор баар, сороҕор суох уонна көҥүллэтии өттүгэр эрэйдээх буолар, — диир Светлана Крюкова. — Ол иһин сэртэпикээттээх ынах этин, Хатас сибиинньэтин этин, атын бородууктабытын Аллараа Бэстээхтэн атыылаһабын. Ирдэбил быһыытынан убаһа этэ көҥүллэммэт. Дьон биһиэхэ астанарыгар бириэмэтэ суох буолан уонна ас арааһын амсайаары сылдьаллар. Күннээҕи аспыт барыта атыыланан бүтэн иһэр. Арыллыахпытыттан ас өр туруо суохтаах диэн санаанан салайтаран киэһэ алта чаас кэнниттэн 15 бырыһыан чэпчэтиилээх атыылыыбыт. Үлэҕэ билэр дьоммун ыла сатыыбын. Хамнастарын төһөнү үлэлээбиттэринэн күнүнэн аахсан иһэллэр. Бырааһынньыктарга бурдук аска сакаастар эмиэ киирээччилэр. Тиэргэммитигэр сайыҥҥы өттүгэр аһаҕас халлаан анныгар олорон аһыыр усулуобуйаны оҥорбуппут. Атыылаһааччыларбыт маҕаһыын иһигэр кыһыннары аһыыр миэстэ баар буоларыгар баҕа санааларын этээччилэр. Инникитин ол туһунан толкуйдуур баҕа санаа эмиэ баар.
Алтана Артемьева, «Саха сирэ» хаһыат, edersaas.ru.