Быйылгы «Хотугу Синергия» ыччат форума атырдьах ыйын 7-11 күннэригэр Мэҥэ Хаҥалас Аллараа Бэстээҕэр буолуоҕа. Кыттааччылар бырайыактарын көмүскүөхтэрэ, бастыҥнара бырабыыталыстыбаттан харчынан грант ылыахтара.
Форум үс хайысханан үлэлиир: «Эн — урбаанньыккын», «Мин — инженербин», «Биһиги доброволецтарбыт». Үһүс хайысхаҕа улуус волонтердарын хомуйан Үтүө көҕүлээһин сылын тэрээһиннэригэр үлэлииргэ бэлэмниэхтэрэ. «Былырыын «Волонтер оскуолата» хайысха кыттааччылара үс граны кыайбыттара. Олортон биирэ Эдэр ыаллар ассоциацияларын тэрийиигэ барбыта. Быйыл волонтердары үөрэтиигэр уонна Новосибирскай уобалар, Башкортостан экспертэрин кытта уопут атастаһыыга сүрүн болҕомтону уурар санаалаахпыт. Билигин улуустарга анаан медик-волонтердары үөрэтэр бырайыактары оҥоро сылдьабыт«, — диэн кэпсиир хайысха салайаччыта Айыллаан Винокуров.
Уһук илиҥҥи ыччат форума Саха сиригэр «СахаСелигер» диэн аатынан 2016 сылтан саҕаламмыта. Ыччат көҕүлүүр, сайыннарар, үөрэтэр аналлаах.
«Хотугу Синергия» формуҥа кыттыан баҕалаахтар от ыйын 27 күнүгэр диэри https://ais.fadm.gov.ru/event/11237 регистрацияланыаххытын сөп.
edersaas.ru