Бэҕэһээҥҥиттэн, атырдьах ыйын 21 күнүттэн, Нам улууһун киинигэр “Хотугу Синергия” ыччат форума үлэтин саҕалаата. Манна өрөспүүбүлүкэ 21 улууһуттан 181 ыччат муһунна.
Форум биэс хайысхалаах: “Мин — Инженербин” (салайааччы Владимир Аммосов), “Саха сирин лиидэрдэрэ” (салайааччы Василина Лукина), “Биһиги доброволецтарбыт” (салайааччы Айыллаан Винокуров), “Профlife” (салайааччы Ирина Бурцева) уонна “Арктика ыччата” (салайааччы Раиса Контоева).
Мустубут ыччаты Ил Дархан уонна Бырабыыталыстыба дьаһалтатын салайааччы Афанасий Владимиров эҕэрдэлээтэ уонна Саха сирин, Арассыыйа сайдыытын туһугар үөрэнэллэригэр, үлэлииллэригэр баҕа санаатын эттэ:
— Баҕа санааҕыт барыта туоларын гына санааҥ. Толкуйдаабыккыт барыта олоххо киирэрин ситиһэр туһугар айыҥ-тутуҥ. Оҥорбуккут барыта дьон туһугар, өрөспүүбүлүкэбит, дойдубут сайдарыгар ананнын.
СӨ Ыччат дьыалаларыгар уонна социальнай коммуникацияларга миниистир Степан Саргыдаев “Хотугу Синергия” форум ыччат биир бастыҥ былаһааккатынан буолбутун бэлиэтиир:
— Манна ыччат бэйэ-бэйэтин кытта кэпсэтэр, уопут атастаһар, сыалын ситиһэр. Тустаах эспиэрдэри, былаас уорганнарын бэрэстэбиитэллэрин, урбаанньыттары, наука үлэһиттэрин о.д.а. кытта кэпсэтэн билиилэрэ-көрүүлэрэ элбиирэ, кэҥиирэ саарбаҕа суох. Туохтан да куттаммакка иннигит диэки хардыылаан иһиэххитин баҕарабын. Бу форумтан үтүө, сырдык эрэ санаалар хааллыннар.
Мустубут ыччат биир нэдиэлэ устата хайысхаларынан арахсан, араас тиэмэҕэ лиэксийэлэри истиэхтэрэ, бырайыактарын көмүскүөхтэрэ, билиилэрин хаҥатыахтара. Бастыҥ бырайыактаахтар граннары сүүйүөхтэрэ.
Айтана Аммосова, «Саха сирэ» хаһыат, edersaas.ru
Андрей Сорокин хаартыскалара.