Өлөөн улууһун саамай уһук нэһилиэгэр, Ээйиккэ, быйылгы кыстыгы көрсө 100 сүөһү турар хотонун тутан киллэрбиттэрэ. Онно олохтоох агро-оскуола иһинэн тэриллибит кэпэрэтиип 70-ча сүөһүтэ быр курдук кыстаата.
edersaas.ru
Устуоруйаттан кылгастык быһа тардан билиһиннэрдэххэ, сопхуос эстэригэр оскуола салалтата ынах сүөһүнү харыһыйан, илдьэ хаалбыт. Онон Ээйик ыаллара баччаҕа диэри үүттэнэн-сүөгэйдэнэн олороллоругар үөрэҕирии-иитии үлэһиттэригэр махтаныахха эрэ сөп. Тыа хаһаайыстыбатын министиэристибэтиттэн көмө көрдөһөн баран, мэлийэннэр, улуус бүддьүөтүттэн үбүлэнэн, аныгылыы сырдык-ыраас, киэҥ-куоҥ хотонноммуттар.
Хотон кыһыҥҥы тымныыга электричество көмөтүнэн эбии сылытыллар уонна салгылатыллар буолан, сиигирбэтин, кураанаҕын, сыта-сымара суоҕун сылдьыбыт ыалдьыт эрэ барыта бэлиэтии көрөр. Саас халлаан сылыйдаҕына, төрөөрү турар уонна саҥа төрөөбүт ынахтартан уратыларын таһырдьа таһааран көччүтэллэр. Манна сахатытыллыбыт симментал эбэтэр, чуолкайа, симменталламмыт саха сүөһүтүн иитэллэр. Дьиҥэр, баччалаах ойуччу сытар дойдуга ыраас саха сүөһүтүн иитэллэрэ бары өттүнэн табыгастаах да, барыстаах да буолуох этэ. “СахаАгроПлем” диэн саҥа тэрилтэ салалтата тугу эмит “буһаран таһаарар” ини диэн ээйиктэр ээр-сэмээр күүтэллэр. Отугар даҕаны ороскуота оччуура чуолкай. Ааспыт сайын курааннаан, от үүммэккэ, быйыл сааһыары кыһын 100 туонна оту тастан атыылаһан тиэйтэрдилэр.
Василий НИКИФОРОВ, edersaas.ru