“Хот-Ой” кулууп дьарыкка ыҥырар

Ааптар: 
Бөлөххө киир:

Чааһынай спортивнай кулууптар аһыллан үлэлииллэрэ – бириэмэ ирдэбилэ буолла. Араас тренажернай саалалар, аэробика, фитнес, теннис, бокса саалаларын тэҥэ, аны былырыыҥҥыттан куораппытыгар көҥүл тустууга сыһыаннаах чааһынай спортивнай кулууп аһыллан үлэлиир. Кулуубу – көҥүл тустууга РФ, хапсаҕайга СӨ спордун маастара Олег Чернов көҕүлээн, “Хот-Ой” диэн ааттаан үлэлэтэн, спорт бу көрүҥүнэн дьарыктаныан баҕалаахтар, сүрүннээн саҥа саҕалааччылар уонна спорду таптааччылар номнуо эрчиллиилэрин саҕалаатылар.

Петр ПАВЛОВ, “Саха сирэ”, edersaas.ru


Кырдьык, билиҥҥи оҕолор, ыччаттар наар көмпүүтэринэн, төлөпүөнүнэн эрэ үлүһүйбүт кэмнэригэр, бириэмэни сөптөөхтүк аттаран эти-хааны эрчийии, физическэй хамсаныылары оҥоруунан дьарыктаныы саамай наадалаах да, туһалаах даҕаны кэмэ үөскээтэ.

“Хот-Ой” кулууп тренерэ, бэйэтэ хапсаҕайга спорт маастара, СГУ физическэй култуураҕа институтун выпускнига, чөл олоҕу тарҕатааччы Семен Егорович Николаев:

Дьон спорду – үрдүк көрдөрүүнү ситиһэр көрүҥ эрэ быһыытынан көрөр, сыаналыыр, оттон дьиҥэ спорт киһини чэбдигирдэр ньыма буоларын өйдөөбөттөр. Спордунан наһаа үлүһүйэн хаалаллар, оттон ылан көрдөххө, улахан спорт – киһи доруобуйатыгар кырата суох охсуулаах. Биһиги кулууппут үлэтин сүрүн соруга – эти-хааны чэбдигирдии, күүһү-уоҕу сайыннарыы. Билиҥҥи оҕолор тыынар уорганнара мөлтөх. Наар көмпүүтэр, интэриниэт эрэ интэриэстээхтэр. Ону туората сатыахтаахпыт. Туох барыта кэмнээх-кэрдиилээх буолуохтаах. Онон биһиги “Хот-Ой” спорка саалабытыгар кэлэн эрчиллэргитигэр ыҥырабыт”, — диир.

“Хот-Ой” кулууп аны быйылгыттан кэҥээн, Дзержинскэй уулуссатыгар турар “Динамо” саалатын түүлэһэн, көҥүл тустууга, хапсаҕайга уонна самбоҕа дьарыктары саҕалаан эрэр. Манна тустууга дьарыгы – норуоттар икки ардыларынааҕы кылаастаах спорт маастара, Азия чөмпүйэнээтин икки төгүллээх призера, норуоттар икки ардыларынааҕы турнирдар кыайыылаахтара уонна призердара Иннокентий Иннокентьев, хапсаҕайга – өрөспүүбүлүкэ 2002 сыллааҕы чөмпүйүөнэ, 2003 сыллааҕы иккис призера, спорт маастара Семен Николаев, оттон самбоҕа – “Азия оҕолоро” норуоттар икки ардыларынааҕы спортивнай оонньуу кыайыылааҕынан буола сылдьыбыт Муса Угурчиев ыыталлар. Кинилэр, спорт бу көрүҥнэринэн дьарыктаныан баҕалаахтары уонна оҕолору эрчиллиигэ ыҥыраллар.

Семен Николаевы кытта салгыы кэпсэтэн биллэххэ, кини физкултуура учууталын быһыытынан Дьокуускайдааҕы 7 №-дээх профессиональнай лицейгэ таһаарыылаахтык үлэлээбит. Ол курдук, кини үлэлиир кэмигэр лицей хамаандата сыл аайы ыытыллар өрөспүүбүлүкэтээҕи комплекснай спартакиадаҕа бириистээх миэстэттэн түспэтэх, дьахталлар спартакиадаларыгар эмиэ ситиһиилээхтик кыттыбыттар. Итинэн, “Хот-Ой»спорт кулуупка идэлэрин таптыыр, бэриниилээх исписэлиистэр үлэлииллэр диэн этиэхпин баҕарабын.

Оттон Семен Егорович билиҥҥи дьарыгар, сүрүн болҕомтону дьон доруобуйатын бөҕөргөтүүгэ уурар. Хас биирдии киһиэхэ, кини доруобуйатын туругун кэтээн көрөн, анал аппараатынан, исписэлиистэри кыттыһыннаран, бырагыраама оҥорор былааннаах. Кырдьык, ханнык даҕаны эмтээҕэр физическэй хамсаныылары оҥорон, саалаҕа кэлэн эрчиллэн, бэйэ доруобуйатын бөҕөргөтөр туһалаах бөҕө буоллаҕа дии. Сахалар, биһиги чөл олохтоох, чэгиэн доруобуйалаах омук буоларбытын ситиһэр санаалаах. Хас биирдии киһи бэйэтин доруобуйатыгар кыһаныахтаах, бириэмэ булан эрчиллиэхтээх диир. Өссө кулууптара кэҥээн, кыаҕыран киирэн бардаҕына, “Доруобуйа” кулуубун аһан, айылҕаҕа тахсан эрчиллиилэри, сүүрүүлэри ыытар баҕа санаалаах.

Бэйэбинэн ылан эттэххэ, оҕо сааска спордунан дьарыктаммыт киһи, биирдэ эмэ кыдьыгыран, били, үөрэппит уустук хамсаныыларбын, ньымаларбын, албастарбын көбүөргэ киирэн оҥорон көрүөхпүн, сымнаҕас маакка тустан күөлэһийэн ылыахпын баҕарталыыбын. “Триумфка” дуу, “”Модуҥҥа” дуу тиийэн, улахан маастардарга мэһэйдиэхпин баҕарбаппын. Кыбыстыылаах даҕаны. Дьэ онуоха, мин курдук көннөрү баҕалаах дьоҥҥо, маннык, “Хот-Ой” спортивнай кулууп аһыллыбыта саамай тоҕоостоох дии саныыбын. Биирдэ эмэ спортивнай таҥаспын кэтэн, өссө уолаттарбын илдьэ бардахпына сатанар эбит. Ааҕааччылары, эһигини эмиэ ыҥырабын. Этэргэ дылы, доруобуйабыт – бэйэбит илиибитигэр. Олорон хаалымыаҕыҥ.

Петр ПАВЛОВ, “Саха сирэ”, edersaas.ru

Максим ТИХОНОВ хаартыскаҕа түһэриитигэр: «Хот-Ой» кулууп тренердэрэ Иннокентий Иннокентьев, Олег Чернов, Семен Николаев.

  

+1
0
+1
0
+1
0
+1
0
+1
0
+1
0
+1
0