СӨ Хомус күнүн көрсө, Дьокуускайга аан дойдутааҕы хомус түмэлигэр бэртээхэй тэрээһин буолла. Бу Таатта улууһун дьаһалтата, улуус култуураҕа уонна духуобунай сайдыыга управлениета, Тыараһа нэһилиэгэ Саха АССР култууратын үтүөлээх үлэһитэ, » Үлэ Кыһыл Знамята» орден кавалера, үҥкүүһүт, артыыс, режиссер, хотугу норуоттар култуураларын тарҕатааччы, мелодист, хомусчут Лука Николаевич Турнин аатынан стипендияны аныырга хомустуур устудьуоннарга күөн күрэһи тэрийдилэр. Сиһилии Таатта улууһун култуураҕа уонна духуобунай сайдыыга управлениетын методиһа Лариса Турнина сэһэргээтэ.
— Тэрээһин үөрүүлээх чааһыгар Голландияҕа варган национальнай киинин салайар Харм Линсен, Хомус аан дойдутааҕы киинин дириэктэрэ Дмитрий Бястинов, Таатта улууһун култуураҕа уонна духуобунай сайдыыга управлениетын начаалынньыга Гаврил Вырдылин эҕэрдэлээтилэр. Хомусчут Лука Турнин олоҕун, айар үлэтин туһунан бу ытык киһи аатын сүгэр Тыараһатааҕы түмэл сэбиэдиссэйэ Светлана Собакина түһүлгэҕэ мустубут ыалдьыттарга сырдатта.
Куонкуруска өрөспүүбүлүкэ бары муннуктарыттан Дьокуускайга араас үөрэх кыһатыгар үөрэнэр тоҕус устудьуон кытынна. Куонкурустаһааччылар бэйэлэрин билиһиннэрдилэр, Лука Турнин оонньообут ньыматынан биир айымньыны толордулар. Урукку сыллар стипендиаттара Ньургун Пахомов, Айтал Мырсанов, Ирина Охлопкова, Токуйаана Николаева, Ариана Михайлова бэлэмнээбит ыйытыыларыгар хоруйдаатылар. Финалга киирбит түөрт кыттааччы тута хоһуйууга күрэстэстилэр. Түмүккэ куонкурус кыайыылааҕынан Дьокуускайдааҕы М.Н.Жирков аатынан муусука кэллиэһигэр фольклор салаатыгар 2 кууруска үөрэнэр Надежда Варламова (Дьокуускай) буолла. Кини Таатта улууһун баһылыга анаабыт 30 тыһ.солк.стипендиятынан, үрүҥ көмүс бэлиэнэн аҕараадаланна. Лука Турнин кыыһа И.Л.Соломонова бары тэрийээччилэргэ, кыттааччыларга махтанна. Куонкуруска кыттыбыт Юрий Абрамовка, Карина Постниковаҕа бэлэхтэрин, Тыараһатааҕы норуот айымньытын дьиэтин дириэктэригэр Алена Сабарайкинаҕа махтал суругун, бэлэҕин туттарда, — диэтэ.
СӨ култууратын туйгуна, өрөспүүбүлүкэ импровизатор-хомусчута, Харбалаахтааҕы оҕо искусствотын оскуолатын дириэктэрэ, Лука Турнин айар үлэтин киэҥник үөрэппит, ырыппыт Людмила Ефремова бэрэссэдээтэллээх дьүүллүүр сүбэҕэ СӨ үөрэҕириитин туйгуна, Лука Турнин хомуска тардар ньыматын тарҕатааччы, Хаандыгатааҕы «Бэйбэрэ» хомусчуттар ансаамбылларын салайар Лидия Борисова, Аан дойдутааҕы хомус киинин уонна түмэлин бэрэсидьиэнэ, профессор, РФ, СӨ култууратын үтүөлээх үлэһитэ Иван Алексеев-Хомус Уйбаан, Л.Турнин төрөппүт кыыһа Ираида Соломонова, 2016 сыллааҕы стипендиатка Токуйаана Николаева үлэлээбиттэр.
Түмүккэ, «Бэйбэрэ» хомусчуттар ансаамбылларын салайар Лидия Борисова Лука Турнин хомустуур бэйбэрэ ньыматынан түһүлгэ кыттыылаахтарын бука барыларын күргүөмүнэн хомустаппыт. Итиэннэ баҕалаахтары ахсынньы 1 күнүгэр түмэлгэ Турнинныы сыыйа тардыыга босхо маастар-кылааска ыҥырбыт.
Сардаана БАСНАЕВА, «Саха сирэ» хаһыат, edersaas.ru