Саха хомуһугар атын омук дьоно оонньуулларын көрдөххүнэ, уратытык ылынаҕын, дууһалыын сырдыыгын.
edersaas.ru
Киин куорат пааркатыгар хаама сылдьан, биир нуучча киһитэ хомуска оонньуурун тоҕуоруһан истэ турар дьоҥҥо чугаһаатым. Бастаан утаа омук киһитэ дии санаабытым. Онтон оонньоон бүппүтүгэр, биир кыыс нууччалыы «киинэҕэ уһулла сылдьаҕын дуо?» диэн ыйыппыта. «Суох, мин маннык хомуска оонньоон сынньанабын«,- диэн хоруйдаабытыгар, интэриэһиргээн, кэпсэтээри, өссө биирдэ оонньуурун истэн турдум.
Бүтээтин кытта, дьэ олохтоохтук кэпсэттибит. Сергей Короленко Үөһээ Халыма Зырянкатыттан сылдьар эбит. Киниэхэ хомуска оонньуон олус баҕарарыттан доҕотторо хомус бэлэхтээбиттэр.
— Саха сирэ олохтооҕо буоларым быһыытынан, хомуһу наһаа интэриэһиргээн, Юлиана Кривошапкинаҕа 10 күн үөрэммитим, онтон эксээмэн туттарбытым. Кинини кытта бэйэтин кэнсиэригэр хомуска оонньоон кыттыбытым. Хомуска оонньоотохпуна, дууһалыын сынньанабын, — диэн санаатын үллэстэр сэһэргэһээччим.
Сергей Короленко инстаграмыттан Юлиананы кытта хомуска оонньуур видеотын көрдөөн булан иһиттим. Иккиэн оонньууллара — бэртээхэй! Юлиана Кривошапкина үөрэнээччитин хайҕаабыт, киэн туттарын биллэрбит.
Сергей киин куорат биир ааттаах-суоллаах бэкээринэтин управляющайынан үлэлиир эбит. Бэйэтэ бэлиэтииринэн, иллэҥ кэмигэр пааркаҕа сынньана таарыйа хомуска оонньоон, дууһатын «сайҕаан» сынньанар.
Елена ПОТОЦКАЯ, «Саха сирэ» хаһыат, edersaas.ru