Сарсын, сэтинньи 2 күнүгэр аан дойдуга бастакытын хомус диктана буолуоҕа. Өскөтүн көннөрү суругунан диктант хайдах быһыылаахтык ааһара өйдөнөр эбит буоллаҕына. Хомус диктана — сонун көстүү. Тиэкиһи суруйаллар дуу, ыйытыыга хоруйдууллар дуу, хомуска тардан иһитиннэрэллэр дуу…
“Саха сирэ” хаһыат, edersaas.ru
Диктант хайдах быһыылаахтык барарын Хомус аан дойдутааҕы түмэлин дириэктэрэ Дмитрий Бястиновтан туоһуластыбыт:
— Хомус түмэлэ тэриллибитэ эһиил 30 сылын туолар. Бу сыллар тухары үгүс үлэ барда, ааттаах-суоллаах дьон таҕыстылар, аан дойдуга биллэр хомус исписэлиистэрэ үүннүлэр. Хомус (варган) аан дойду 200 норуотугар баара биллэр.
Национальнай өрөспүүбүлүкэ буоларбыт быһыытынан, култуурабыт биир көрүҥүн — хомуһу норуот төһө дириҥник билэрин, киэҥник өйдүүрүн, биһиги тэрээһиннэрбитигэр төһө кыттарын билээри ыытабыт, — диэн быһаарда.
Хотугулуу-Илиҥҥи федеральнай университет иһинэн хомус базовай хаапыдырата үлэлиир. Быйылгы үөрэх дьылыгар ХИФУ иһинэн устудьуоннары, нэһилиэнньэни хомуска үөрэтии факультатив быһыытынан үөрэҕин саҕалаабыт. Хомус диктана ыытыллыытыгар университет өйөөн, икки улахан аудиторияны көрбүттэр.
Манна СӨ култууратын уонна духуобунай сайдыытын миниистирин солбуйааччылар, салайааччылар, нэһилиэнньэ кыттара биллэр. Диктант тест быһыытынан барар. Хас биирдии кыттааччы нүөмэрдэнэр, аата-суола ыйыллыбат. Түмүк түмэл саайтыгар тахсыаҕа, кыттааччылар нүөмэрдэринэн киирэн хайдах толорбуттарын көрүөхтэрин сөп диэн тэрийээччилэр иһитиннэрэллэр.
Дьокуускай куорат олохтоохторун, ыалдьыттарын, хомуска билиитин тургутан көрүөн баҕалаах дьону бука барыгытын, сэтинньи 2 күнүгэр диктаҥҥа ыҥыраллар.
Буолар сирэ: Кулаковскай аат. уулусса 42-с нүөмэрдээх дьиэтэ (Хотугулуу-Илиҥҥи федеральнай университет сүрүн үөрэтэр куорпуһун (ГУК) 245-с уонна 247-с аудиториялара.
Күнэ-дьыла: сэтинньи 2 күнэ, киэһэ 17:00 чаастан
Людмила ПОПОВА, “Саха сирэ” хаһыат, edersaas.ru