Өрөспүүбүлүкэ холуобунай-исполнительнай систиэмэтин үлэһиттэрин быйылгы ыһыахтара Экология сылыгар ананна.
Ону сырдатыам иннинэ, былырыыҥҥы, Киинэ сылыгар анаммыт ыһыахтарын санатан аһарыым. Онно холуонньалар, отделлар хас биирдии хамаандалара урукку сэбиэскэй киинэлэртэн, остуоруйалартан сөбүлүүллэрин талан ылан, тиэмэлэрин онно анаабыттара.
Ол курдук, “Ирония судьбы или С легким паром!”, “Три мушкетера”, “Свадьба в Малиновке”, “Цыган. Возвращение Будулая”, “Операция “Ы”, “Кавказская пленница”, “Приключения Буратино” уо.д.а киинэлэр дьоруойдарын илэ харахпытынан көрбүппүт. Маныаха киһи кэрэхсиирэ диэн — ыһыахтарыгар үлэһиттэр оҕолоро эмиэ көхтөөхтүк кытталлар.
Бу накаастабылы толорор уорганнар ыһыахтарыгар сылын аайы сылдьар киһи бииртэн сөҕөбүн – ханнык да тиэмэҕэ ананнын, көстүүмнэригэр, атрибутикатыгар тиийэ ымпыктаан-чымпыктаан, улахан эппиэтинэстээхтик сыһыаннаһан бэлэмнэнэллэрин. Быйыл да сүрдээҕин кыһаллан, сыраларын ууран бэлэмнэммиттэрэ ала-бэлиэ.
Ыһыах хамаандалар стройдаан киирэн, бэйэлэрин билиһиннэриилэриттэн уонна былаахтары өрө таһаарыыттан саҕаланна. Ол кэнниттэн алгысчыт аал уоту оттон, Үрдүк Айыыларга айах тутан, ыһыах аһыллыытын сиэрин-туомун толордо.
Саамай интэриэһинэй түһүмэх — жюри чилиэннэрэ түһүлгэлэри кэрийэ сылдьан сыаналааһыннара. Быйылгы түһүлгэлэри Экология сылыгар, Саха сирэ Арассыыйа састаабыгар киирбитэ 385 сылыгар итиэннэ Өктөөп Өрөбөлүүссүйэтин 100 сыла туоларыгар анаан оҥорбуттар, киэргэппиттэр. Буоларын курдук, түһүлгэлэрин бэрт сиэдэрэйдик киэргэтэн, саха маанылаах астарын — саламааттан саҕалаан, сылгы хартатыгар тиийэ — астаан аҕалан, сүрдээҕин кыһаллыбыттар.
Эбиэттэн киэһэ холуобунай-исполнительнай систиэмэ бэтэрээннэрин айар куонкурустара ыытылынна — хоһоон аахтылар, ырыа ыллаатылар. Хас биирдии кыттааччы сыаналаах бэлэҕинэн наҕараадаланна.
Киэһэлик мас тардыһыытыгар, хапсаҕайга уонна ханаат тардыһыытыгар ыһыылаах-хаһыылаах, бэрт тыҥааһыннаах күрэхтэһиилэр ыытылыннылар.
Жюри быһаарыытынан, уопсай түмүккэ фестиваль-куонкурус кыайыылааҕынан Табаҕатааҕы 7 №-дээх кытаанах эрэсиимнээх холуонньа хамаандата буолла. 5-с №-дээх эмтиир-көннөрөр холуонньа хамаандата иккис миэстэҕэ тигистэ, оттон үһүс миэстэҕэ хонбуойдааһын отделын хамаандата таҕыста.
Вера МАКАРОВА, «Саха сирэ» хаһыат, edersaas.ru
Хаартыска: РФ Накаастабылы толорор федеральнай сулууспатын Саха сиринээҕи управлениетын пресс-сулууспата уонна ааптар.