Холуонньаларга ааспыт сылга 287 суотабай төлөпүөнү киллэрэ сатаабыттар
Биһиги сайтпыт холуонньаларга бобуулаах маллары киллэрэ сатааһын туһунан чахчылары хам-түм сырдатааччы. Ону тэҥэ, бу дьайыылар иһин туох эппиэтинэс күүтэрин туһунан эмиэ.
Бу боппуруоска анаммыт РФ Накаастабылы толорор федеральнай сулууспатын Саха сиринээҕи управлениетыгар буолбут пресс-конференцияҕа начальнигы солбуйааччы эбээһинэһин быстах кэмҥэ толорор, ис сулууспа полковнига Дмитрий Бубякин кытынна.
Кини иһитиннэрбитинэн, хаайыыларга бобуулаах маллары киллэриини бохсууга куттал суох буолуутун отделларын сотрудниктара үлэлииллэр. Кинилэр бу сабыылаах учреждениеларга хас кэлбит киһини барытын бэрэбиэркэлииллэр. Ону таһынан, баһыылкалары, бандероллары, передачалары эмиэ кинилэр көрөллөр.
Ол курдук, ааспыт 2017 сылга 233,95 грамм наркотигы, 287 суотабай төлөпүөнү, 162 л испиирдээх утаҕы булан былдьаабыттар. Административнай сокуону кэһэн, 42 эппиэккэ тардыллыбыт. Аҕыс киһи — холуобунай эппиэккэ.
Санатар буоллахха, маннык дьайыылары оҥорбут киһи РФ Административнай кодексатын 19.12-с ыстатыйатынан эппиэккэ тардыллар. Бу ыстатыйанан буруйдаммыт киһи 3 тыһ. солк. — 5 тыһ. солк. суумалаах ыстараап төлүүр.
Маннык сокуону кэһээччинэн, сүрүннээн, хаайыылаахтар аймахтара, атастара-доҕотторо буолаллар эбит. Сороҕор сокуону билбэттэриттэн (бу иһин эппиэттиэххэ сөбүн), үксүгэр, бэркэ диэн билэ-билэ. Онуоха араас албаһы, ньыманы барытын туттааччылар. Бэлиэтээн эттэххэ, сокуону кэспит киһи ыстараап төлүүрүн ааһан, ол аҕалбыт малларын, бородуукталарын эмиэ былдьатар.
Вера Макарова, «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.
