ХИФУ-ну бүтэрбит Николай Местников Татарстаҥҥа икки куонкуруска бастаата

Ааптар: 
Бөлөххө киир:

Хотугулуу-Илиҥҥи федеральнай университет физика-тиэхиньиичэскэй институтун бүтэрбит Николай Местников наукаҕа-тиэхиньикэҕэ бырайыага Казань куоракка саҥаны киллэрии куонкуруһун дьүүллүүр сүбэтин үрдүк сыанабылын ылла.

edersaas.ru

Алтынньыттан ахсынньыга диэри Казань куоракка “Татарстан Өрөспүүбүлүкэтигэр 50 саҥаны киллэрии өйүгэ(идиэйэ)” диэн бырайыактыыр үлэ уонна “У.М.Н.И.К. — 2018” саҥаны киллэриини көҕүлүүр фонда өрөспүүбүлүкэтээҕи куонкуруһа ыытылынна. Николай Местников “Химград” АУо номинациятын уонна “УМНИК” бырагыраама кыайыылааҕын дипломнарын ылла. “Тустаах куонкурустарга тыалынан уонна күнүнэн үлэлиир эбийиэктэргэ аккумулятор оннугар суперконденсатор энергиятын научнай-тиэхиньиичэскэй бырайыагын кэпсээтим”, — диэн Николай быһаарар. Куонкуруска киирбит үлэлэри Татарстан Өрөспүүбүлүкэтин Наукаларын академиятын уонна “Идиэйэ” технопаарка дьүүллүүр сүбэтин чилиэннэрэ сыаналаатылар. Николай Местников бырайыагын научнай салайааччыта – тиэхиньиичэскэй наука кандидата, ХИФУ Чукоткатааҕы филиалын бэрэпиэссэрэ Юрий Королюк уонна тиэхиньиичэскэй наука дуоктара, Казаннааҕы судаарыстыбаннай энергетическэй университет теплоэнергетикэҕэ институтун бэрэпиэссэрэ Эльмас Нуруллин. “Сыл курдук оҥордум. “Сахаэнергоҕа” быраактыкабын бара сылдьан сүрүн кыһалҕа тугун билбитим. Хомойуох иһин, аккумуляторы 5-6 сылга биирдэ хайаан даҕаны уларытар ирдэнэр уонна үчүгэйдик үлэлиирин курдук өрүү 15-20 кыраадыс сылааһы тутар ирдэнэр. Научнай салайааччыбын кытта итинтэн тахсар суолу көрдөөһүнү саҕалаабыппыт”, — диэн Николай эбэн этэр.
Николай Местников быйыл ХИФУ физика-тиэхиньиичэскэй институтун бакалавриатын бүтэрдэ. Билигин Казаннааҕы судаарыстыбаннай энергетическэй университет теплоэнергетикэҕэ институтугар үөрэнэр. “Өрөспүүбүлүкэтээҕи лиссиэйгэ 11-с кылааска үөрэнэ сырыттахпытына “Якутскэнергоҕа” экскурсияҕа илдьибиттэрэ. ГРЭС-1 уонна ЯТЭЦ эбийиэктэригэр сырытыннарбыттара. Онно сылдьан баран энергетик буоларга быһаарыммытым. Магистратура кэнниттэн хайаан да дойдубар төннөр уонна өрөспүүбүлүкэм сайдарын туһугар үлэлиир былааннаахпын”, — диэн санаатын үллэстэр.

Виктория ЕГОРОВА, ХИФУ пресс-сулууспата.

+1
0
+1
0
+1
0
+1
0
+1
0
+1
0
+1
0