ХИФУ устудьуоннара муус устар бүтүөр диэри ыраахтан үөрэнэллэр

Ааптар: 
Бөлөххө киир:

М.К.Аммосов аатынан Хотугулуу-Илиҥҥи федеральнай университет устудьуоннара дойду бэрэсидьиэнэ Путин ыйааҕар олоҕуран, муус устар бүтүөр диэри ыраахтан олорон үөрэнэллэр. Онтон салгыы?

edersaas.ru

Аҕыйах хонугунан өрспүүбүлүкэ кыһыҥҥы суоллара сабыллаары тураллар. Манан сибээстээн үгүс устудьуоннар, төрөппүттэр хайдах дьаһаныахтарын билбэттэр. Билигин ыытыахтарын дьиэлэриттэн олорон үөрэнэр курдуктар, ыам ыйыгар университекка бэйэтигэр кэлэн уруккулуу үөрэтэбит диэхтэрин суол сабыылаах буолар.

ХИФУ штаты таһынан үлэҕэ уонна ыччат бэлиитикэтигэр проректора Александр Ильин: “Бүгүҥҥү күннээҕи туругунан, биһиги муус устар 30 күнүгэр диэри ыраахтан олорон (дистанционно) үөрэниэхтээхпит. Салгыы ыарыы хайдаҕыттан көрүөхпүт. Сотору суоллар сабыллаллар, онтон салгыы ыам ыйынааҕы өрөбүллэр кэлиэхтэрэ. Ыам ыйын ортотугар диэри син биир үөрэх урукку чөлүгэр түһэ охсубата биллэр. Ыам ыйын бүтүүтэ сырыы саҕаланар. Билиҥҥи толкуйбутунан, кыра куурустарга —  бакалаврдарга (1-3 куурустар), специалитеттарга (1-4 куурустар) дистанционно үөрэҕи бүтэрэр кыахтаахпыт. Иллэрээ күн деканнары, дириэктэрдэри кытта дистанционнай мунньах буолбута. Күн бүгүн диплом туттарааччыларбытын толкуйдуу сылдьабыт. Дипломнарын ыраахтан олорон тутар кыахтаахтар. Онон долгуйумуохтарын сөп”, — диэн Эдэр саас саайтка быһаарда.

Людмила ПОПОВА, edersaas.ru

+1
0
+1
0
+1
0
+1
0
+1
0
+1
0
+1
0