ХИФУ устудьуоннара олоҥхону нууччалыы тылбаастаатылар...
Олох-дьаһах

ХИФУ устудьуоннара олоҥхону нууччалыы тылбаастаатылар

ХИФУ устудьуоннара уонна преподавателлэрэ Тимофей Захаров-Чээбий “Ала Булкун бухатыыр” олоҥхотун нууччалыы тылбааһын кинигэтин сүрэхтээтилэр.

edersaas.ru

Кинигэҕэ научнай ыстатыйалар, быһаарыылар уонна этиилэр, ону таһынан РФ Хотугулуу-Илиҥҥи  норуоттарын уонна култуураларын институтун саха тылын истилиистикэтигэр уонна нууччалыы-сахалыы тылбааска хаапыдыратын устудьуоннара оҥорбут олоҥхо тылбааһа киирдилэр.
Тимофей Захаров-Чээбий – биллиилээх олоҥхоһут. Кини маастарыстыбатын, талаанын, баай эпическэй тылларын сүһүөҕүн уонна толорор быһыытын исписэлиистэр, олоҥхону сэҥээрээччилэр үрдүктүк сыаналыыллар. Олоҥхону мин “Мир перевода” научнай куруһуогум устудьуоннара тылбаастаатылар”, — диэн РФ Хотугулуу-Илиҥҥи норуоттарын уонна култуураларын институтун дассыана Ирина Собакина кэпсиир.
Олоҥхону тылбаастааһыҥҥа бу кинилэр иккис бырайыактара буолар. “Үлэтэ уустук эрээри, умсугутуулаах. Устудьуоннар тылбааска ылсыахтарын иннинэ элбэх литэрэтиирэни аахпыттара, сэминээрдэргэ сылдьыбыттара. Быраактыкалаах буолалларын туһугар хаапыдыра устудьуоннары араас тылбаастыыр бырайыактарга сыһыарар. Үлэлэрэ кэлин бэчээккэ тахсаллар”, — диэн дассыан бэлиэтиир.
Тимофей Захаров-Чээбий “Ала Булкун бухатыыр” олоҥхото Амма улууһун дьаһалтатын сакааһынан тылбаастанна. Бырайыакка эпоһы чинчийээччи Василий Илларионов салайааччылаах университет үлэһиттэрэ эмиэ кытыннылар.

 

Дмитрий ИВАНОВ, ХИФУ пресс-сулууспата.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

1 × два =