Уон сыл анараа өттүгэр, М.К.Аммосов аатынан Саха судаарыстыбанай университетын базатыгар Хотугулуу-Илиҥҥи федеральнай университет төрүттэммитэ.
“Саха сирэ” хаһыат, edersaas.ru
Университет үбүлүөйдээх тэрээһинигэр анаммыт учуонайдар Сэбиэттэрин киэҥ мунньаҕар ХИФУ ректора Анатолий Николаев университет сыыппараҕа көһөр былааннаҕын, үөрэх бырагырааматыгар сыыппаранан модуллар киириэхтэрин, 10-20 бырыһыана онлай-үөрэхтээһин буолуон иһитиннэрдэ. “Уон сыл устата күүстээх университекка кубулуйдубут. Инникитин өссө түмсэн, үтүө түмүгү ситиһиэхтээхпит”, — диэн эттэ.
ХИФУ бэрэсидьиэнэ Евгения Михайлова хайысхаларынан кэлиҥҥи уон сылга туох ситиһиллибитин билиһиннэрдэ. Өскөтүн, маҥнай тэриллэригэр, 2009 үөрэх дьылыгар 123 бырагыраамалаах эбит буоллахтарына, билигин ити сыыппара 465-кэ тэҥнэспит. Университет устудьуоннары үөрэтиинэн эрэ муҥурдаммат, өрөспүүбүлүкэ оскуолаларын кытта хото үлэлэһэр. Тустаах хайысхаҕа Арассыыйаҕа түөрт иһигэр киирбиттэр. Аны үөрэҕин бүтэрбит дьон үлэнэн хааччыллыылара үрдүк эбит. Саха сирин, Арассыыйаны ааһан, тас дойдуга тиийэ үлэлииллэр. Холобур, былырыын 22 устудьуон Кытайга үлэлии хаалбытын туһунан бэрэсидьиэн дакылаатын кэмигэр иһитиннэрдэ. Инникитин аан дойду билинэр үрдүк үөрэҕин кыһатыгар кубулуйан, 2030 сылга диэри аан дойду таһымнаах исписэлиистэри бэлэмнээн таһаарыахтаахпыт диэн ыйда.
Ил Түмэн бэрэссэдээтэлин солбуйааччы Антонина Григорьева: “Университет, талааннаах салайааччы, улахан учуонай Евгения Исаевна салалтатынан элбэҕи ситистэ. 10 сыл устата дьиҥнээх профессионаллар хамаандалара түмүлүннэ. Преподавателлэр аныгы технологияны, үөрэтии ньыматын хото киллэрэн туһаналлар, научнай-чинчийэр үлэлэри ыыталлар. Университеты бүтэрбит дьон экэниэмикэ, социальнай эйгэ бары боппуруоһун быһаараллар”, — диэн бэлиэтээтэ.
Онтон Дьокуускай куорат мээрэ Сардана Авксентьева: “Дьокуускай куорат бүгүҥҥүтэ уонна саамай сүрүнэ, кэнэҕэскитэ сайдарыгар университет төһө улахан өҥөлөөҕүн сыаналыыр уустук. Саҥа сүүрэннэри, хайысхаллары арыйара, тутуһара дакылааттан көстөр. Соторутааҕыта Арктикатааҕы инновационнай кииҥҥэ сырыттым. Эдэр учуонайдар “харахтара уоттааҕын”, кыттыгас араас интэриэһинэй бырайыактары толкуйдаан таһааралларыттан улаханнык сөхтүм”, — диэн тоһоҕолоон эттэ.
Үөрүүлээх тэрээһиҥҥэ мустубут дьон, салайааччылар үтүө тылларын, баҕа санааларын тиэртилэр.
Людмила ПОПОВА, “Саха сирэ” хаһыат, edersaas.ru
Андрей СОРОКИН (СИА) хаартыскаҕа түһэриилэрэ.