Хотугулуу-Илиҥҥи федеральнай университет Математикаҕа уонна информатикаҕа институтун дириэктэрэ Вера Афанасьева IT-исписэлиис идэтин баһылыан баҕарар абитуриеннар ханнык хайысхаларга болҕомто ууруохтарын, үөрэхтэрин бүтэрбиттэр ханна үлэлиэхтэрин сөбүн уонна эдэр исписэлиис туохха бэлэм буолара ирдэнэрин кэпсээтэ.
“Абитуриеннар IT-хайысхалары сэҥээрэллэр”
Дириэктэр иһитиннэрбитинэн, бакалавриакка маннык IT-исписэлиистэри бэлэмнииллэр: прикладной математика уонна информатика, фундаментальнай информатика уонна информационнай технология, информатика уонна вычислительнай тиэхиньикэ, прикладной информатика. Ону таһынан, “инфокоммуникационнай технология уонна сибээс систиэмэтэ” диэни киллэриэххэ сөп диэн бэлиэтиир. “Ыйыллыбыт хайысхаларынан бастакы кууруска 150 миэстэ көрүллэр. Быйыл бакалавриакка саҥа хайысха былааннаммат”, — диэн дириэктэр иһитиннэрдэ.
Кэлиҥҥи сылларга IT-хайысхалар улаханнык ирдэнэллэр, абитуриеннар сэҥээрэллэр диэн этэр. “Үчүгэй исписэлиис буолан тахсарга дьаныар, тулуур, биллэн турар, фундаментальнай бэлэм, холобур, математикаҕа, ирдэнэр. Көмпүүтэринэн дьиссипилиинэҕэ, программированиеҕа улахан болҕомто ууруллар. Информационнай технология кафедратын дассыана Никифор Павлов салалтатынан куруһуок үлэлиир. Биһиги устудьуоннарбыт Уһук Илин уокурукка программированиеҕа бастыҥнарыттан үөрэбит, WorldSkills Russia чөмпүйэнээт «Разработка решения с использованием технологии блокчейн» диэн компетенциятын призердара, IT-хайысхаларынан араас куонкурустарга, хакатоннарга бастыыллар”, — диэн кэпсиир.
Устудьуоннар былаан быһыытынан үөрэх уонна үлэ быраактыкатын ааһаллар. Кафедралар тэрилтэлэри кытта дуогабардаһаллар. Вера Афанасьева, үгүс устудьуоннар бастакы куурустан саҕалаан сүүмэрдээһини ааһаллар уонна «MyTona», «Синет», «InDriver» курдук биллэр, кэскиллээх хампаанньаларга быраактыкаланаллар, Саха сирин сайдыыта уо.д.а. корпорацияларга быраактыкаҕа ыҥырыы туталлар диэн этэр. “Хас биирдии тэрилтэҕэ IT бэлэмнээһиҥҥэ тус уратыта уонна ирдэбилэ араас. Биһиги ылбыт билиитин ханна баҕарар туһанар, ханнык баҕарар бырагырааманан уонна систиэмэнэн үлэлиир исписэлииһи бэлэмниир соруктаахпыт. Көмпүүтэр уонна информационнай технология өрүү саҥардылла турар уобалас буолар. Биһиги тулабытыгар буолар уларыйыыны билэ, оннооҕор көрө олоробут. Онон ханнык баҕарар IT-исписэлиис өрүү үөрэнэргэ, саҥа технологияны ылынарга уонна инники сылдьарга бэлэм буолуохтаах” – диэн бэлиэтиир.
Быйыл ХИФУ Математикаҕа уонна информатикаҕа институтун 175 бакалавр уонна 75 магистр бүтэрэр, ол иһигэр IT хайысхатыгар — 132 бакалавр, 31 магистр. Бакалавры бүтэрбиттэр сүрүннээн үөрэхтэрин магистратураҕа салҕыыллар, 10 киһи үлэлиир былааннаах. Магистратураны бүтэрбиттэр номнуо үлэҕэ дуогабардаахтар. Үөрэхтэрин бүтэрбиттэртэн элбэх киһи бааннарга, «MyTone», «Синет», уо.д.а. тэрилтэлэргэ төрөөбүт өрөспүүбүлүкэлэрэ сайдарын туһугар үлэлииллэр.
Светлана ПАВЛОВА (ХИФУ).