ХИФУ-га “Выпускник-2019”: Саҥа сэлиэнньэ туһугар!” үрдүк үөрэх кыһаларын икки ардыларынааҕы IV форум ыытыллыаҕа

Хотугулуу-Илиҥҥи федеральнай университекка “Выпускник-2019”: Саҥа сэлиэнньэ туһугар!” үрдүк үөрэх кыһаларын икки ардыларынааҕы IV форум ыытыллыаҕа. Манна үрдүк уонна орто үөрэх кыһаларын бүтэрээччилэр доруобуйа харыстабылын, тыа хаһаайыстыбатын, иһитиннэрэр технологиялар, култуура, үөрэхтээһин, өрөспүүбүлүкэ оройуоннарыгар туризм эйгэлэригэр социальнай суолталаах бырайыактара уонна биисинэс-көҕүлээһиннэрэ ыытыллыаҕа. Тэрээһин муус устар 12 күнүгэр ХИФУ “Сэргэлээх уоттара” култуура киинигэр 15:00 чаастан саҕаланыаҕа.

ХИФУ Карьераҕа киинин үлэһиттэрэ этэллэринэн, тохсунньу 22 күнүттэн олунньу 25 күнүгэр диэри үрдүк уонна орто анал үөрэх кыһаларын бүтэрээччилэр өрөспүүбүлүкэ муниципальнай тэриллиилэрин баһылыктарын уонна бэрэстэбиитэллэрин кытта көрсүбүттэрэ. Манна быйыл үөрэҕи бүтэрэр 2500 устудьуон кыттыбыта.  “Выпускник-2019”: Саҥа сэлиэнньэ туһугар!” форум – бу ХИФУ оройуоннарга үлэлии барыахтаах араас идэлээх үөрэҕи бүтэрээччилэргэ анаммыт кэлимсэ бырайыагын түмүктүүр тэрээһинэ”, — диэн киин салайааччыта Александр Индеев иһитиннэрдэ.

“Тус идэлэрин сэргэ эдэр исписэлиистэр өрөспүүбүлүкэ сайдыытын бырагырааматын чэрчитинэн тыа сирин нэһилиэктэрин сайдыыларын соруктарын быһаарсыахтара уонна биэс сыл устата маны олоххо киллэриинэн дьарыктаныахтара. Бырайыак олоххо киирбит сылларыгар тыа сиригэр 3000 тахса эдэр исписэлиис үлэ миэстэтин булла”, — диэн эбэн эттэ Александр Индеев.

Сыл аайы ыытыллар форумҥа быйыл Саха Өрөспүүбүлүкэтин Ил Дархана Айсен Николаев, Арассыыйа наукаҕа уонна үрдүк үөрэхтээһиҥҥэ миниистирэ Михаил Котюков, Арассыыйа Уһук Илини сайыннарыыга миниистирэ Александр Козлов, ону тэҥэ өрөспүүбүлүкэ министиэристибэлэрин уонна биэдэмистибэлэрин салайааччылара, норуот дьокутааттара, муниципалитеттар баһылыктара уонна тэрилтэлэр бэрэстэбиитэллэрэ кыттыахтара.