ХИФУ 9/2 кампуһун уопсайыгар харантыын биллэрилиннэ. Маныаха биир устудьуонтан COVID-19 булуллуута төрүөт буолла.
Ректор Анатолий Николаев: “Биһиги вирус устудьуоннар уопсайдарыгар киирбититтэн айманныбыт. 9/2 нүөмэрдээх уопсайга биир киһи ыалдьыбыта бэлиэтэнэр. Онон сибээстээн, тустаах уопсайга харантыын биллэриллэр. Билигин кини хантаахтаспыт дьонун быһаараллар, онно олорор устудьуоннартан уонна үлэһиттэртэн анаалыс ылаллар. Кинилэргэ барыларыгар университеттан көмө оҥоһуллуоҕа. Биһиги сорукпут – билиҥҥи уустук кэмҥэ бэйэ-бэйэҕэ көмөлөһүү”, — диэн эттэ.
Ыарыынан сибээстээн, 9/2 нүөмэрдээх уопсайга олорбут 319 устудьуон бары анаалыс туттарыахтара, икки нэдиэлэ устата быраастар кэтэбиллэригэр сылдьыахтара. Уопсайга санация оҥоһуллар, ону таһынан, уопсай иһигэр устудьуоннар хаамыылара тохтотуллар. Харантыын кэмигэр тустаах уопсайга харантыыҥҥа олорор устудьуоннары университет аһылыгынан, мэдиссиинэ сириэстибэтинэн хааччыйыаҕа.
Санатан эттэххэ, РФ наукаҕа уонна үрдүк үөрэххэ миниистирэ Валерий Фальков бирикээһигэр олоҕуран, устудьуоннар бука бары кулун тутар 17 күнүттэн дистанционнай үөрэххэ көспүттэрэ. Кулун тутар 20 күнүттэн уопсайга атын дьону киллэрии бобуллубута. Университет бары дьиэлэрин күннэтэ санитарнай сириэстибэнэн сууйаллар. Үлэһиттэр, олоҕу уонна эбийиэктэри харабыллыыр дьонтон ураты эмиэ дистанционнай үлэҕэ көспүттэрэ.
Улахан болҕомтону тас дойдуттан кэлии уонна Евросойуус дойдуларыттан биирдиилээн быраактыкаланар устудьуоннарга ууруллубута. Атын дойдулартан кэлбиттэр булгуччулаах медицинскэй көрүүнү ааспыттара, икки нэдиэлэ устата харантыыҥҥа олорбуттара. Ону таһынан, тас дойду бэрэпиэссэрдэрин, научнай үлэһиттэрин кэлиитэ тохтотуллубута. Бэлиэтээн эттэххэ, дистанционнай үөрэх ыам ыйын 17 күнүгэр диэри уһаабыта.
ХИФУ пресс-сулууспата.