Сыллата устудьуоннарга аналлаах араас олимпиадалар ыытыллаллар. Олортон биирдэстэринэн норуоттар икки ардыларынааҕы аһаҕас интэриниэт-олимпиада буолар. Соторутааҕыта гуманитарнай хайысхаҕа буолбут олимпиадаҕа Хотугулуу-Илиҥҥи федеральнай университеттан 123 устудьуон кыттан, 20 миэстэни ыллылар.
“Саха сирэ” хаһыат, edersaas.ru
ХИФУ саайтыгар интэриниэт-олимпиада үрдүк үөрэх кыһатын тутулуга суох сыаналааһын уонна хаачыстыбаны салайар аналлааҕын бэлиэтээбиттэр.
ХИФУ естественнэй наукаларга институтун 3-с кууруһун устудьуона, А.Е.Мординов аатынан Тааттатааҕы лиссиэйи бүтэрбит, олимпиада нуучча тылын дьиссипилиинэтин “Биотехнология уонна медицинэ” хайысхатыгар кыһыл көмүс мэтээли ылбыт Дария Филатова: “Олимпиадаларга оскуола сылларыттан кыттабын. Нуучча тылыгар уонна литэрэтиирэҕэ улууска өрүү бастааччыбын. Бу олимпиада икки түһүмэҕинэн ааста. Икки чаас устата барда, 25 ыйытыылаах этэ. Арассыыйаттан, уопсайа, 62 оҕо кытынна. Сорох ыйытыыта уустук, билиини эрэйэрэ. Бастакы кууруска үөрэнэр сылбар бу олимпиадаҕа үһүс миэстэлэммитим, быйыл бастаатым”, — диэн кылгастык санаатын үллэһиннэ.
Людмила ПОПОВА, “Саха сирэ” хаһыат, edersaas.ru.