Кэлиҥҥи сылларга Хатас нэһилиэгэр биэрэк сиҥнэн, бөҕөргөтүү үлэтин ыытыы курдук сытыы боппуруос турбута уонтан тахса сыл буолла.
edersaas.ru
Өрүс биэрэгэр олорор ыаллар дьиксиниилэрин өйөөн, олохтоох дьаһалта бу боппуруоска үөһээ салалтаны кытта үгүс былааннаах үлэни ыытар. Бу туһунан Хатастааҕы «Тускул» култуура киинин иһинэн түөлбэлэр уонна уопсастыбаннай тэрилтэри сүрүннүүр исписэлиис Наталья Руфова бу курдук кэпсиир:
— Биэрэк сиҥнэн тиэргэни аҥаарыттан ордугун сотон ылбыт, дьиэ муннугар тиийбит түгэнэ үгүс. Хотону этэ да барбаккын. Күттүөннээх үбүлээһин көрүллүбэт буолан, араас ньыма барыта туттуллар да, хомойуох иһин, ол айылҕа алдьатыытын туох да кыайбат курдуга.
Быйыл саас халааны утары дьэ сэниэлээх хамсаныы, абыраллаах көмө үлэтэ барда. Ол курдук, өр кэмҥэ сытыырхайбыт боппуруоһу быһаарар инниттэн куорат дьаһалтатын баһылыга Сардаана Авксентьева тус бэйэтинэн тахсан, олохтоохтору кытта көрсөн, тустаах балаһыанньаны үөрэппитэ.
Ол түмүгэр 10 мөл., солк. суумалаах үп көрүллэн, харах көрө үөрэр, дууһа уоскуйар гына үлэ-хамнас барда. Биллэн турар, Ил Дархан Айсен Николаев халаан боппуруоһун тус хонтуорулугар ылан, итиччэ улахан суума араас таһымнаах министиэристибэлэр, хамыыһыйалар, эппиэттээх тэрилтэлэр нөҥүө ыллыктаах кэпсэтии түмүгэ буоларын өйдүүбүт. Онон биэрэк үрдүгэр олорор Соровтар, Павловтар, Тараннар, Рожиннар дьиэ кэргэттэрэ: «Нэһилиэкпит дьаһалтатыттан саҕалаан, өрөспүүблүкэбит уонна куораппыт салалтатыгар махталбыт муҥура суох», — диэн үөрэ-көтө, сүргэлэрэ көтөҕүллэн санааларын үллэстэллэр.
Хатас нэһилиэгин олохтоохторо биэрэги бөҕөргөтөр үлэ өссө да салгыы ыытыллыаҕа диэн эрэллэрин биллэрэллэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа – Наталья Руфова түһэриитэ.