Кэлиҥҥи кэмҥэ дойду киин куораттарыттан саҕалаан, омук сирдэригэр тиийэ араас улуустан айар кэлэктиибинэн тиийэн кэнсиэрдээн, быыстапкалаан, куонкуруска кыттан кэлэр буоллулар.
edersaas.ru
Ол эрээри ол онон түмүктэнэн, улам бэйэ икки ардыгар ааспыты санааһыыга эрэ кубулуйар. Оттон айар-тутар аартыктара тиэрдибит сиригэр бэйэлэрин сырыыларын туһунан кинигэ хомуйан таһаарааччы — ахсааннаах.
Онон бу суруйуубун болҕомтоҕо ылан, хатастар холобурдарын анаан батыһыҥ диэн ыҥырабын.
Хатастааҕы »Тускул» култуура киинин иһинэн уопсастабынньыктары кытта үлэлэһэр Наталья РУФОВА бу кинигэ туһунан санаатын маннык үллэтэр:
— Быйыл Санкт-Петербург куоракка 19 киһилээх дэлгээссийэ анал сырыытын кэпсиир кинигэ оҥоһуллуоҕа диэн эрдэттэн бэлэмнэнэн, хаартыскалары, ахтыылары, санаалары, ырытыылары, ол быыһыгар, эрэкэлээмэни холбоон, кинигэбитин оҕо курдук бүөбэйдээн таһаардыбыт.
Кинигэ »Тускул» Култуура киинин иһинэн үлэлиир »Күнтэн күнтэн» холбоһук «Хатас сирэйэ» диэн бырайыак чэрчитинэн оҥоһулунна. Билиҥҥи кэмҥэ кэлии-барыы дэлэй, ол улахан сонун буолбатах. Ол эрээри хас биирдии сырыы тус-туһунан сыаллаах -соруктаах, хатыламмат түгэннэрдээх.
Бу кинигэ биир улахан соруга — Тускул» Култура киинин иһинэн үлэлиир холбоһуктар, түмсүүлэр, куруһуоктар үлэлэригэр сылдьар, кыттар, ыллыыр-туойар, иистэнэр, уруһуйдуур, айар-тутар дьоммут, биир дойдулаахтарбыт туһунан сиһилии кэпсээһин, кинилэр айар эйгэлэрин арыйан, киэҥ араҥаҕа таһаарыы. Кинигэҕэ Хатас народнай тыйаатырыгар үлэлиир көмүс куоластаах Иван Казанов, »Хатастар сандалы тула», »Уруһуй — дууһа уоскулаҥа» диэн кинигэлэр ааптардара, ону тэҥэ кулууп үлэтин методикатыгар аналлаах В.А.Чепалов, Н.И.Руфова үлэлэрэ, С. Сивцев хоһооннорун хомуурунньуга, Н.И.Руфова кэпсээннэрэ бэчээттэннилэр. Кинигэбитин В.А.Чепалов тэрийэн үлэлэтэр дьоҕус «Айспринт» фирмата бэчээттээтэ. Дьэ онон, бар дьоммут, истиҥ уонна сэргээҥ — »Күнтэн күн» айар түмсүү өссө биир кинигэтин!
Кырдьык да, бэртээхэй бырайыак эбит!
Елена ПОТОЦКАЯ, «Саха сирэ» хаһыат, edersaas.ru