Хатас-Павловскай хайысханан өрүһү туоруур суол арыллыыта хойутуон сөп (ВИДЕО)
Халлаан сылаас буолан, Хатастан Павловскайга өрүһү туоруур суол ситэ оҥоһулла илик. Өлүөнэ өрүскэ кыдьымах быыһыгар сиикэй сирдэр билигин да элбэхтэр. Халлаан сылааһыттан өрүһү туоруур суол хойут арыллыан сөп диэн СӨ суолун хаһаайыстыбатын салалтата биллэрдэ.
Алтынньы бастакы күннэриттэн тоҥоруулары баттаһа, СӨ суолун хаһаайыстыбатын салалтата Хатас аннынааҕы үрэхтэн Өлүөнэ өрүскэ киирэр суолу оҥорон саҕалаабыта. От үлэтигэр, муус ылыытыгар сылдьар улахан тиэхиньикэлэр сир тоҥо илигинэ сылдьан, суолу дэлби хаһан кэбиһэллэр. Ол иһин, СӨ суолун хаһаайыстыбатын салалтата тута грейдеринэн суолу тэҥниир үлэни ыытар. Сэтинньиттэн сир тоҥноҕуна, суолу кумаҕынан кутан массыыналар сылдьалларыгар бэлэмнээһин үлэтин ыыталлар. Суол үс арыыны уонна икки үрэҕи нөҥүөлээн нөҥүө биэрэккэ тиийэр. Быйыл иккис арыыга тахсар үрэҕи кутан оҥорбуттарын кэнниттэн, халлаан сылаас буолан муус анныттан уу тахсан кутуллубут учаастагы бүрүйэн кэбиспит.
«Быйыл халлаан олус сылаас. Иккис арыыга тахсар суолу бүтэрэн истэхпитинэ уу тахсан кутуллубут учаастагы бүрүйэн кэбистэ. Суолу Өлүөнэ икки кытылыттан оҥоһуллар. Үлэ үчүгэйдик барарыгар, өрүс турарыгар — 30 кыраадыс тымныы туруон наада. Былырыын сэтинньи 20 күнүгэр суолу бүтэрэн 3 туоннаҕа диэри ыйааһыннаах массыыналар сылдьалларын көҥүллээбит буоллахпытына, быйыл халлаан туругуттан тутулуктаах буолла», — диир Семен Сметанин.
Өрүһү туоруур суол түөрт кэрдиистээх буолуоҕа: икки сүрүн уонна икки саппаас. Суол арылыннаҕына, түүннэри-күнүстэри массыына ыйааһынын хонтуруоллуур сулууспа үлэлиэҕэ. Суол уопсай уһуна — 20 км.
ВИДЕО:
Николай Попов, «Саха сирэ» хаһыат, edersaas.ru