Саха дьахтара барахсан сааскы күннэр сандаархай сардаҥаларын кытта сайа көтөр сайаҕас санаа долгунугар олорсон, бэрт кыраттан, дуона да суохтан үөрэр-көтөр, сүргэтэ көтөҕүллэр.
edersaas.ru
Бу күннэргэ эҕэрдэ эйэҕэһэ, алгыс аламаҕайа кэрэ аҥаардарга ананар.
Хатастааҕы «Тускул» Култуура киинигэр истиҥ иһирэх, сырдык сыдьаайдаах, сылаас тыыннаах киэһэ буолла. Ол курдук 9 сааһыттан саҕалаан, аҕам сааска тиийэ эр дьон эҕэрдэ кэнсиэрдэрэ буолла.
»Уолан» кылаас уолаттара, эр дьон ырыа бөлөҕө сыананы тобус толору тахсан тураллара көрөргө, истэргэ астыга бөҕө. Хас биирдии толорооччу, эҕэрдэлээччи саамай чугас дьонноро — кэргэннэрэ, ийэлэрэ, оҕолоро, аймах билэ дьоно саалаҕа олороро, туһугар, туспа ураты уйан турукка киллэрдэ.
Оскуолаҕа киириэн иннинээҕи сааһыттан биһиги кулууппут сыанатыгар ыллаан-туойан, араас таһымнаах күрэхтэргэ, көрүүлэргэ кыайыы кынатыгар олорон дайбыт, билигин дьиэ кэргэн аҕа баһылыга, үлэһит киэнэ бэрдэ, оччотооҥҥу Володя, күн бүгүн Владимир Габышев ыллыы тахсарын көрөөччү ытыс тыаһынан доҕуһуоллаан көрүстэ. Владимир даҕаны, Хатаһын көрөөччүтүн ахтыбыт, бу көрсүһүүнү күүппүт буолан, ырыалара олус табыллан, ис иһиттэн истиҥник, астынан-дуоһуйан туран ыллаан, барыбытын долгутта да, үөртэ да. Айаал Корякин күн бүгүн эдэр саас саамай кэрэ кэмигэр сылдьар. Кини — ХИФУ устудьуона. Айаалы урут оҕо уһуйаанын саҕанааҕытын өйдүүр эбит буоллахпытына, оҕобут улааппытын, сиппитин-хоппутун көрөн, үөрдүбүт. Уопсайынан хас биирдии нүөмэр туһугар туспа ураты тыыннаах, истиҥ-иһирэх — Афанасий Колачёв ахтылҕаннаах Ой Бэһин туһунан, Василий Тихонов дьол диэн тугун туойар, Василий Чупров биэс бэһиэлэй кыргыттары хоһуйар, Алексей Калининскай саха кэрэ далбардарын туһунан кэпсиир, сцена бэтэрээнэ, эргиччи талаан Андрей Малышев кэрэ кыыһы хоһуйар, биллиилээх мелодист Исай Брызгалов анараа үйэттэн бу да күҥҥэ, кэмҥэ кэрэтин сүтэрбэтэх «Күндү доҕоруом» диэн ырыалара саалаҕа олорор араас көлүөнэ көрөөччүнү барыларын биир санааҕа, биир тыыҥҥа, биир тэтимҥэ киллэрдилэр.
Татьяна Окорокова дьарыктыыр оҕолорун — уолаттарын ырыалара биир туспа кэрэ кэпсээн, сэргэх сэһэн буолла. Уолаттар оскуола боруогун атыллыахтарыттан ырыа эйгэтигэр киирбиттэрэ. Бу киэһэ биһиги кинилэр салайааччыларын кытта тэҥҥэ буһуу-хатыы, тупсуу оскуолатын бара сылдьалларын көрөн, ис сүрэхпититтэн үөрдүбүт. Саха дьонун сиэринэн сэмээр «оҕолорбут айар-тутар суолларыгар куруутун күөх уот буоллун» диэн алгыаҕыҥ. Хас биирдиилэрин төрөппүттэригэр үтүөнү-кэрэни баҕарыаҕыҥ. Сайдам Поротов, Сарыал Иванов, Алгыс Попов, Сулустаан Копырин — ок-сиэ, ааттыырга да астык ааттар дии, саха буолартан киэн туттуу сахта!
Кэнсиэри сиртэн-буортан бэрт чэпчэкитик дайар уонна оруобуна оннук дайар дорҕоонноох ырыалардаах күтүөт уолбут Дьулус Гоголев мелодист Иван Аргунов »Эн баар буолаҥҥын» диэн ырыатынан бу кэнсиэргэ кэлбит хас биирдии кэрэ аҥаары, кырдьык да, кэрэ эбитин итэҕэтэрдии ыллаата-туойда.
Бу киэһэни дьону-сэргэни кытта ыкса үлэлии сылдьар эдэр дьоммут — нэһилиэк дьаһалтатын исписэлиистэрэ Алексей Осипов уонна Семен Игнатьев кыайа тутан ыыппыттара, туһугар туспа кэрэхсэбил, хайҕабыл буолла.
Маны таһынан, олох үөһүгэр үлэлии сылдьар урбаанньыттар дьоҕус тэрилтэлэрин аатыттан бэлэх туттаран, улахан үөрүү-көтүү, махтал бастыҥа буолла. Анастасия Никифорова (такси сулууспата) — үс босхо айан, Ирина Пестерева («Королева» салон) — тыҥырах оҥоһуутугар уонна кыламан тупсарыытыгар босхо толуон. Кэнсиэри тэрийээччи «Тускул» Култуура киинин салалтата Мария Соболева кэнсиэригэр икки ыҥырыы билиэт уонна 5000 солкуобайы уу харчынан бэлэхтээтэ. Кэнсиэрбит уотун-күөһүн, дорҕоонун Алексей Иванов, араас хартыынанан,ойуунан киэргэлин, биллэриитин Валентин Чепалов оҥордулар.
Манна даҕатан эттэххэ, Хатаска эр дьон олус түмсүүлээх, сомоҕолоһуулаах. Ол курдук, Дьокуускай куорат эҥэригэр биһиэхэ эрэ уонунан сыл »Байанай » күрэҕин ыытабыт, эр дьоммут мустан «Саллаат пааматынньыга» стеланы өрөмүөннээбиттэрэ, тупсарыы үлэтигэр субуотунньуктары тэрийбиттэрэ. Кэлиҥҥи сылларга тэрилтэлэргэ, уопсастыбаннай түмсүүлэргэ эр киһи салайааччы хото эбилиннэ.
Ийэ дойдуга бэриниилээх буолуу сылыгар мантан инньэ хатастар өссө да үгүс тэрээһиннэри ыытарга былаанныыбыт.
«Саха сирэ» хаһыат, edersaas.ru анаан Наталья РУФОВА,
Хатастааҕы «Тускул» Култуура киинин иһинэн үлэлиир уопсастыбаннай тэрилтэлэри сүрүннээччи.