Хас биирдии тутуу техническэй кинигэлээх буолуо
Олох-дьаһах

Хас биирдии тутуу техническэй кинигэлээх буолуо

Саҥа дьиэ тутулуннаҕына, аны билигин күлүүс оннугар техническэй өттүнэн тутуу өр сулууспалыырын туһугар көрүү-истии ыйынньык кинигэтин биэриэхтэрэ. Бу туһунан СӨ  архитектураҕа уонна тутуу ситимигэр миниистир Вера Кузакова муус устар 24 күнүгэр суруналыыстары кытта көрсүһүү кэмигэр иһитиннэрдэ.

edersaas.ru

«Тутуллубут дьиэ ортотунан 50 сыл устата сулууспалыахтаах. Тутуу үйэлээх, сылаас, олорорго, үлэлииргэ табыгастаах буоларын туһугар техническэй эксплуатация ирдэбилин тутуһуохха наада. Ол туһугар турба тэстиэн, саахал тахсыан иннинэ сөптөөх өрөмүөн оҥоһуллуохтаах, дьиэ иһэ-таһа саҥардыллан биэриэхтээх. Салайар хампаанньалар, дьиэни бас билээччилэр табаарыстыбалара хомунаалынай өҥөнү биэриинэн эрэ муҥурданаллар. Элбэх кыбартыыралаах дьиэҕэ олорооччулар дьиэлэрин иһинээҕини эрэ оҥостубакка, уопсай турба, подьезд, лифт туругун туһугар эппиэтинэһи сүгэ үөрэниэхтээхтэр», — диэн эттэ кини.

Тутуллубут эбийиэктэр үйэлээх буолалларын туһугар тустаах министиэристибэ СӨ судаарыстыбаннай сакаасчытын сулууспатын кытта саҥа этии киллэрдилэр. Ол курдук, балансаҕа киирэр дьиэ хаһаайыныгар, холобур, балыыһа кылаабынай бырааһыгар, эбэтэр оскуола дириэктэригэр тутууну хайдах көрөргө-истэргэ, үйэтин уһатарга ыйынньык остуол кинигэтин, альбом курдук оҥорон биэриэхтэрэ.

Онно техническэй сулууспа үлэһиттэрин хас киһини үлэҕэ ылан хамнастыыр, тутуу туругун күһүн-саас хаста бэрэбиэркэлиир, туохха болҕомто уурар барыта сурулла сылдьыа.

Элбэх кыбартыыралаах дьиэҕэ олорор ыаллар дьиэлэрин техническэй туругун туоһулуур акт оҥоһуллан, салайар хампаанньаҕа харалла сытыахтаах. Ону интэриэһиргээбит киһи кинилэртэн көрдөөн, ылан көрүөн сөп.

 

Марианна Тыртыкова, «Саха сирэ», edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

пятнадцать − 13 =